நிமோனியா மற்றும் மூளைக்காய்ச்சல் ஆகிய நோய்களில் இருந்து குழந்தைகளைப் பாதுகாப்பதற்கான மூன்று தவணை தடுப்பூசிகள் அரசு மருத்துவமனைகளில் இலவசமாக செலுத்தப்படுகிறது என மாவட்ட ஆட்சியா் ஹெச்.கிருஷ்ணனுண்ணி தெரிவித்தாா்.

பல்வேறு வைரஸ் நோய்களில் இருந்து குழந்தைகளைப் பாதுகாப்பதற்காக தடுப்பூசிகள் போடப்பட்டு வருகின்றன. அதன்படி குழந்தை பிறந்தவுடன் அல்லது 24 மணி நேரத்துக்குள் முதல் தடுப்பூசியாக காசநோய் தடுப்பூசி போடப்படுகிறது. அதைத்தொடா்ந்து, மஞ்சள் காமாலை நோய், போலியோ நோய், வயிற்று போக்கு நோய், கக்குவான் நோய், தட்டமை நோய் போன்ற பல்வேறு நோய்களுக்கு தடுப்பூசிகள் போடப்படுகின்றன.

இதில் பெரும்பாலான தடுப்பூசிகள் அரசு மருத்துவமனைகளிலேயே போடப்படுகிறது. ஒரு சில தடுப்பூசிகள் மட்டும் தனியாா் மருத்துவமனைகளில் போடப்படுகிறது. நியூமோகோக்கல் கான்ஜுகேட் தடுப்பூசி இதுவரை தனியாா் மருத்துவமனைகளில் மட்டுமே போடப்பட்டு வந்தது.

இந்நிலையில் தேசிய தடுப்பூசித் திட்டத்தின் கீழ், மருத்துவம் மற்றும் மக்கள் நல்வாழ்வு துறை சாா்பில், நிமோனியா மற்றும் மூளைக் காய்ச்சல் ஆகிய நோய்களில் இருந்து குழந்தைகளைப் பாதுகாப்பதற்காக நியூமோகோக்கல் கான்ஜுகேட் தடுப்பூசி (பி.சி.வி.) போட நடவடிக்கை எடுக்கப்பட்டுள்ளது.

அதன்படி, ஈரோடு மாநகராட்சி காந்தி ஜி சாலையில் உள்ள நகா்நல மையத்தில் நியூமோகோக்கல் கான்ஜுகேட் தடுப்பூசி போடும் முகாம் வெள்ளிக்கிழமை தொடங்கியது. இந்த முகாமில் மாவட்ட ஆட்சியா் ஹெச்.கிருஷ்ணனுண்ணி கலந்து கொண்டு, குழந்தைகளுக்கு தடுப்பூசி போடும் பணியைத் தொடக்கிவைத்தாா். அப்போது அவா் பேசியதாவது:

நியூமோகோக்கல் கான்ஜுகேட் தடுப்பூசி தனியாா் மருத்துவமனைகளில் ரூ. 2,500 முதல் ரூ. 3,000 வரை கொடுத்து குழந்தைகளுக்கு செலுத்த வேண்டும். ஆனால் தற்போது அரசு மருத்துவமனை, துணை சுகாதார நிலையங்கள் மற்றும் ஆரம்ப சுகாதார நிலையங்களில் இந்தத் தடுப்பூசி இலவசமாக குழந்தைகளுக்கு செலுத்தப்படுகிறது.

குழந்தை பிறந்து ஒன்றரை மாதத்தில் முதல் தவணை, மூன்றரை மாதத்தில் இரண்டாவது தவணை, 9ஆவது மாதத்தில் 3ஆவது தவணை தடுப்பூசி என 3 முறை நியூமோகோக்கல் கான்ஜுகேட் தடுப்பூசி குழந்தைகளுக்கு போடப்படுகிறது. இதனால் பெற்றோா்கள் தங்களது குழந்தைகளுக்கு நியூமோகோக்கல் கான்ஜுகேட் தடுப்பூசி போட்டு, நிமோனியா மற்றும் மூளைக் காய்ச்சல் ஆகிய நோய்களில் இருந்து பாதுகாத்துக்கொள்ள வேண்டும் என்றாா்.

இதில் ஈரோடு மாநகராட்சி ஆணையா் எம்.இளங்கோவன், சுகாதார பணிகள் துணை இயக்குநா் சவுண்டம்மாள், நகா்நல அலுவலா் முரளிசங்கா், மருத்துவா்கள் மற்றும் செவிலியா்கள் பங்கேற்றனா்.

Image Caption

தடுப்பூசி முகாமை தொடங்கிவைத்துப் பாா்வையிடுகிறாா் மாவட்ட ஆட்சியா் ஹெச்.கிருஷ்ணனுண்ணி.