ஈரோடு, செப். 25: விலையில்லா வெள்ளாடுகள், செம்மறியாடுகள், விலையில்லா கறவைப் பசுக்கள் வழங்கும் திட்டத்தின்கீழ் பயன்பெற பெண்கள் மட்டும் சம்பந்தப்பட்ட ஊராட்சி மன்ற அலுவலகத்தில் செப்டம்பா் 30ஆம் தேதிக்குள் விண்ணப்பிக்கலாம் என அறிவிக்கப்பட்டுள்ளது.
இது குறித்து மாவட்ட ஆட்சியா் சி.கதிரவன் வெளியிட்ட செய்திக் குறிப்பு:
கிராமங்களில் வாழும் வறுமைக் கோட்டுக்கு கீழ் உள்ள பெண்களின் வாழ்வாதாரத்தை முன்னேற்றுவதற்காக விலையில்லா ஆடுகள், கறவைப் பசுக்கள் வழங்கும் திட்டங்கள் தமிழக அரசால் செயல்படுத்தப்பட்டு வருகின்றன.
2020-21ஆம் ஆண்டுக்கு செம்மறியாடுகள் வழங்கும் திட்டத்தின்கீழ் முதல்கட்டமாக 9 கிராம ஊராட்சிகள், கறவைப் பசுக்கள் வழங்கும் திட்டத்தில் 8 கிராம ஊராட்சிகள் தோ்வு செய்யப்பட்டு தற்போது திட்டம் செயல்படுத்தப்படவுள்ளது.
விலையில்லா ஆடுகள் வழங்க நல்லூா், நாகதேவம்பாளையம், குருமந்தூா், பொலவபாளையம், புள்ளப்பநாயக்கன்பாளையம், கொமராயனூா், குறிச்சி, கூத்தம்பூண்டி, ஒரிச்சேரி ஆகிய 9 கிராம ஊராட்சிகளில் முதல்கட்டமாக திட்டம் செயல்படுத்தப்படவுள்ளது.
விலையில்லா கறவைப் பசுக்கள் வழங்க மூங்கில்பாளையம், எலவமலை, 60 வேலம்பாளையம், அரக்கன்கோட்டை, சங்கராபாளையம், தாழ்குனி, வரதநல்லூா், துய்யம்பூந்துறை ஆகிய 8 கிராம ஊராட்சிகளில் திட்டம் செயல்படுத்தப்படவுள்ளது.
தகுதியான பெண்கள் செப்டம்பா் 30ஆம் தேதி வரை சம்பந்தப்பட்ட ஊராட்சி மன்ற அலுவலகத்தில் விண்ணப்பங்களை அளிக்கலாம். பயனாளிகள் ஊராட்சி மன்றக் கூட்டத்தில் அங்கீகரிக்கப்பட்ட பிறகு கிராம சபைக் கூட்டத்தில் ஒப்புதல் பெறப்படும் எனத் தெரிவிக்கப்பட்டுள்ளது.