தைப்பூசத்தை முன்னிட்டு கோவை - திண்டுக்கல் இடையே சிறப்பு ரயில் இயக்கப்பட உள்ளதாக ரயில்வே நிா்வாகம் சாா்பில் தெரிவிக்கப்பட்டுள்ளது.

பழனி முருகன் கோயிலில் கும்பாபிஷேகம் மற்றும் தைப்பூசத்தையொட்டி சிறப்பு ரயில் இயக்க வேண்டும் என பயணிகளின் தரப்பில் தொடா்ந்து கோரிக்கை விடுக்கப்பட்டு வந்தது. இந்நிலையில், கோவை - திண்டுக்கல் இடையே சிறப்பு ரயில் இயக்கப்படுவதாக சேலம் ரயில்வே கோட்டம் சாா்பில் தெரிவிக்கப்பட்டுள்ளது.

இதுதொடா்பாக, ரயில்வே நிா்வாகம் வெளியிட்டுள்ள செய்திக்குறிப்பு: கோவை - திண்டுக்கல் இடையே ஜனவரி 27, 28, 29, பிப்ரவரி 4, 5, 6 ஆகிய 6 நாள்கள் பழனி முருகன் கோயிலில் கும்பாபிஷேகம் மற்றும் தைப்பூசத்தையொட்டி முன்பதிவில்லாத சிறப்பு ரயில்கள் இயக்கப்படுகின்றன.

அதன்படி, இந்த நாள்களில் காலை 9.20 மணிக்கு கோவையில் இருந்து புறப்படும் சிறப்பு ரயில் காலை 11.43 மணிக்கு பழனியை சென்றடையும். பிற்பகல் 1 மணிக்கு திண்டுக்கல் சென்றடையும். இதேபோல, திண்டுக்கல்-கோவை சிறப்பு ரயில், மேற்கண்ட தேதிகளில் திண்டுக்கல்லில் இருந்து பிற்பகல் 2 மணிக்கு புறப்பட்டு மதியம் 3 மணிக்கு பழனியை சென்றடையும். மாலை 5.30 மணிக்கு கோவையை சென்றடையும்.

இந்த ரயிலானது, போத்தனூா், கிணத்துக்கடவு, பொள்ளாச்சி, கோமங்கலம், உடுமலைப்பேட்டை, மைவாடி சாலை, மடத்துக்குளம், புஷ்பத்தூா், பழனி, சத்திரப்பட்டி, ஒட்டன்சத்திரம், அக்கரைப்பட்டி உள்ளிட்ட ரயில் நிலையங்களில் நின்று செல்லும் என்று தெரிவிக்கப்பட்டுள்ளது.