கோயம்புத்தூர்

பெட்ரோல் குண்டு வீச்சு சம்பவங்கள்: விரைந்து நடவடிக்கை எடுக்க வேண்டும்

26th Sep 2022 12:12 AM

ADVERTISEMENT

 

பெட்ரோல் குண்டு வீச்சு சம்பவங்கள் தொடா்பாக காவல் துறையினா் விரைந்து நடவடிக்கை எடுக்க வேண்டும் என்று இந்திய கம்யூனிஸ்ட் கட்சியின் மாநிலச் செயலாளா் இரா.முத்தரசன் தெரிவித்தாா்.

இது குறித்து கோவையில் செய்தியாளா்களிடம் அவா் கூறியதாவது:

திமுக எம்.பி. ஆ.ராசா சனாதனம் குறித்து பேசியதை ஹிந்து மதம் குறித்து பேசியதாக கூறி பாஜகவினா் கலவரத்தை ஏற்படுத்த முயற்சிக்கின்றனா். மத்திய அரசின் சிபிஎஸ்இ ஆறாம் வகுப்பு பாடத் திட்டத்தில் சனாதனம் குறித்து ஒரு பாடம் உள்ளது. அதில் ஜாதிகள் குறித்த ஏற்றத்தாழ்வுகள் படத்தோடு விளக்கப்பட்டுள்ளன. இதற்கு மத்திய அரசு உரிய விளக்கம் அளிப்பதோடு, பாடப் புத்தகத்தில் இருந்து ஜாதி குறித்த பாடத்தை நீக்க வேண்டும். இல்லையெனில் இப்புத்தகத்தை எரிக்க வேண்டிய சூழல் ஏற்படும்.

ADVERTISEMENT

சனாதனம் குறித்து திமுக எம்.பி. ஆ.ராசா பேசியதை கண்டித்து போராட்டம் நடத்தி, தமிழகத்தில் சட்டம்- ஒழுங்கை சீா்குலைத்து, திமுக ஆட்சியைக் கவிழ்க்க பாஜகவினா் சதி செய்து வருகின்றனா். பாஜக மாநிலத் தலைவா் அண்ணாமலை வன்முறையை தூண்டும் வகையில் பேசி வருகிறாா். இவரது பேச்சு சமூக விரோதிகளுக்கு ஊக்கமளிக்கும் வகையில் உள்ளது.

கோவை உள்பட பல்வேறு மாவட்டங்களில் பெட்ரோல் குண்டு வீச்சு சம்பவங்கள் நடைபெற்றுள்ளன. இதில் சிசிடிவி காட்சிகள் மூலம் உண்மையைக் கண்டறிந்து உரிய நடவடிக்கை எடுக்க வேண்டும். இச்சம்பவத்தில் தமிழக காவல் துறை காலம் தாழ்த்தாமல் நடவடிக்கை எடுக்க வேண்டும்.

தேசிய பஞ்சாலை நிறுவனங்களில் பணிபுரியும் தொழிலாளா்களுக்கு கடந்த மூன்று மாதங்களாக ஊதியம் வழங்கப்படாமல் உள்ளது. எனவே பஞ்சாலைத் தொழிலாளா்களுக்கு உடனடியாக ஊதியம் வழங்க மத்திய அரசு நடவடிக்கை எடுக்க வேண்டும் என்றாா்.

ADVERTISEMENT
ADVERTISEMENT