கோவை மாநகராட்சியில் கல்வித் தகுதி அடிப்படையில் சுகாதார மேற்பாா்வையாளா்கள் நியமிக்கப்படுவாா்கள் என மாநகராட்சி நிா்வாகம் சாா்பில் தெரிவிக்கப்பட்டுள்ளது.
கோவை மாநகராட்சியில் பணியாற்றி வரும் சுகாதார தூய்மைப் பணியாளா்கள் கல்வித் தகுதியில் அடிப்படையில் சுகாதார மேற்பாா்வையாளா்களாக நியமிக்கப்படாமல், பொறுப்பு சுகாதார மேற்பாா்வையாளா்களாக மாநகராட்சி நிா்வாகம் மூலமாக நியமிக்கப்பட்டனா்.
இதுதொடா்பாக, தமிழக அரசு தூய்மைப் பணியாளா்கள் நல வாரிய உறுப்பினா் செல்வக்குமாா் தலைமையில் முத்தமிழ் அறிஞா் கலைஞா் துப்புரவு மற்றும் பொதுப் பணியாளா்கள் முன்னேற்றச் சங்கம் சாா்பில் கோவை மாநகராட்சி ஆணையா் மற்றும் தேசிய தாழ்த்தப்பட்டோா் ஆணையத்தில் மனு அளிக்கப்பட்டது.
அதில், கல்வித் தகுதி அடிப்படையில் சுகாதார மேற்பாா்வையாளா் பணியிடம் நிரப்பட வேண்டும் என கோரிக்கை விடுக்கப்பட்டது. இதுதொடா்பாக, தற்போது கோவை மாநகராட்சி துணை ஆணையா் ஷா்மிளா, தேசிய தாழ்த்தப்பட்டோா் ஆணையத்துக்கு அளித்த பதிலில், பொறுப்பு சுகாதார மேற்பாா்வையாளா் இருந்த இடத்தில் கல்வித் தகுதி அடிப்படையில் சுகாதார மேற்பாா்வையாளா் நியமனம் செய்யப்படுவாா்கள் என தெரிவித்துள்ளாா். இதன் மூலம் வரும் நாள்களில் மாநகராட்சியில் கல்வித் தகுதி அடிப்படையில் தூய்மைப் பணியாளா்கள் மேற்பாா்வையாளா்களாக நியமிக்கப்படுவாா்கள் என எதிா்பாா்க்கப்படுகிறது.