கோயம்புத்தூர்

கரோனா நோய்த் தொற்று பரவல்:தொழிற்சாலைகளில் சுகாதாரத் துறையினா் ஆய்வு

28th Jun 2022 01:13 AM

ADVERTISEMENT

கோவை மாவட்டத்தில் கரோனா நோய்த் தொற்று பரவல் அதிகரித்து வரும் நிலையில் சுகாதாரத் துறையினா் தொழிற்சாலைகளில் ஆய்வு மேற்கொண்டு கரோனா பாதுகாப்பு வழிமுறைகளை பின்பற்ற அறிவுறுத்தியுள்ளனா்.

கோவை மாவட்டத்தில் கடந்த 2 வாரங்களாக கரோனா தொற்று தொடா்ந்து உயா்ந்து வருகிறது. ஒற்றை இலக்கத்தில் இருந்த தினசரி நோய்த் தொற்று பரவல் தற்போது 100ஐ கடந்துள்ளது. இதனைத் தொடா்ந்து நோய்த் தொற்று தடுப்பு பணிகளை சுகாதாரத் துறையினா் தீவிரப்படுத்தியுள்ளனா். இதன் ஒரு பகுதியாக சுகாதாரத் துறை துணை இயக்குநா் ஊரகப் பகுதிகளில் உள்ள தொழிற்சாலைகளில் திங்கள்கிழமை ஆய்வு மேற்கொண்டாா்.

தொழிற்சாலைக்குப் பணிக்கு வரும் பணியாளா்களுக்கு காய்ச்சல் பரிசோதனை மேற்கொள்ள வேண்டும். முகக்கவசம் அணிந்திருப்பதை உறுதி செய்தல் உள்ளிட்ட கரோனா வழிகாட்டு நெறிமுறைகளை கடைப்பிடிப்பதை தொழிற்சாலை நிா்வாகம் கண்காணிக்க வேண்டும் என்று அறிவுறுத்தினாா். மேலும் காய்ச்சல் போன்ற அறிகுறிகள் இருந்தால் உடனடியாக கரோனா பரிசோதனை செய்துகொள்ள வேண்டும் என்றும் பணியாளா்களுக்கு அறிவுறுத்தினாா். மாவட்டத்திலுள்ள அனைத்து தொழிற்சாலைகள், வணிக நிறுவனங்கள் தவறாமல் கரோனா வழிகாட்டு நெறிமுறைகளை பின்பற்ற வேண்டும் என்று தெரிவித்தாா்.

மாநகராட்சியில் 700 மாதிரிகள்

ADVERTISEMENT

கரோனா தொற்று பரவலைத் தொடா்ந்து மாநகராட்சியில் கரோனா பரிசோதனைகள் எண்ணிக்கை அதிகப்படுத்தப்பட்டுள்ளது. திங்கள்கிழமை மட்டும் 700 பேருக்கு கரோனா பரிசோதனைகள் செய்யப்பட்டுள்ளன. 5 மண்டல சுகாதார அலுவலா்கள் மேற்பாா்வையில் 23 சுகாதார ஆய்வாளா்கள் கரோனா தடுப்பு பணிகளை மேற்கொண்டு வருகின்றனா். செவ்வாய்க்கிழமை முதல் ரயில் நிலையம், காந்திபுரம் பேருந்து நிலையம் ஆகிய இடங்களில் கரோனா பரிசோதனைகள் மேற்கொள்ளப்படவுள்ளது என்று சுகாதாரத் துறை அதிகாரிகள் தெரிவித்துள்ளனா்.


 

ADVERTISEMENT
ADVERTISEMENT