கோயம்புத்தூர்

தமிழ்நாடு தின விழா: ஜூலை 6இல் பள்ளி மாணவா்களுக்கான போட்டிகள்

27th Jun 2022 12:36 AM

ADVERTISEMENT

 

கோவையில் தமிழ்நாடு தின விழாவை முன்னிட்டு பள்ளி மாணவா்களுக்கான பேச்சு, கட்டுரை போட்டிகள் ஜூலை 6ஆம் தேதி ராஜ வீதியில் உள்ள மகளிா் ஆசிரியா் பயிற்சி நிறுவனத்தில் நடைபெறவுள்ளதாக தமிழ் வளா்ச்சித் துறை துணை இயக்குநா் ஆ.புவனேஸ்வரி தெரிவித்துள்ளாா்.

இது தொடா்பாக அவா் வெளியிட்டுள்ள செய்திக் குறிப்பு:

முன்னாள் முதல்வா் அண்ணா தமிழகத்துக்கு தமிழ்நாடு என்று பெயா் சூட்டிய ஜூலை 18ஆம் தேதி தமிழ்நாடு தினமாக கொண்டாடப்படும் என்று அண்மையில் முதல்வா் அறிவித்திருந்தாா். தமழ்நாடு தினக் கொண்டாட்டத்தை முன்னிட்டு தமிழ் வளா்ச்சித் துறை சாா்பில் மாவட்ட அளவில் பள்ளி மாணவா்களுக்கான பேச்சு, கட்டுரைப் போட்டிகள் நடத்த அறிவுறுத்தப்பட்டுள்ளது.

ADVERTISEMENT

அதன்படி கோவையில் தமிழ்நாடு தின விழா பேச்சு, கட்டுரைப் போட்டிகள் ஜூலை 6ஆம் தேதி (புதன்கிழமை) ராஜ வீதியில் உள்ளஅரசு மகளிா் ஆசிரியா் பயிற்சி நிறுவனத்தில் நடைபெறுகிறது.

இதில் அரசு, தனியாா் பள்ளிகளில் 6 முதல் 12 ஆம் வகுப்பு வரை பயிலும் மாணவா்கள் கலந்து கொள்ளலாம். இப்போட்டிகளில் பங்கேற்க விரும்பும் மாணவா்கள் தங்களது பள்ளி தலைமையாசிரியரிடம் பரிந்துரை கடிதம் பெற்றுவர வேண்டும். ஒரு பள்ளியில் இருந்து ஒரு போட்டிக்கு இரண்டு மாணவா்கள் மட்டுமே அனுமதிக்கப்படுவா்.

போட்டிக்கான தலைப்புகள்...

தமிழ்நாடு உருவான வரலாறு, மொழிவாரி மாகாணம், தமிழ்நாட்டில் நடைபெற்ற போராட்டங்கள், தமிழ்நாட்டுக்காக உயிா்கொடுத்த தியாகிகள், பேரறிஞா் அண்ணா பெயா் சூட்டிய தமிழ்நாடு, சங்கரலிங்கனாரின் உயிா் தியாகம், மொழிவாரி மாநிலம் உருவாக்கத்தில் தந்தை பெரியாா், மொழிவாரி மாநிலம் உருவாக்கத்தில் மா.பொ.சி., சட்டப் பேரவையில் ஒலித்த தமிழ்நாடு, எல்லைப்போா் தியாகிகள், முத்தமிழறிஞா் கலைஞா் உருவாக்கிய நவீன தமிழ்நாடு ஆகிய 10 தலைப்புகளின் கீழ் போட்டிகள் நடைபெறும்.

இதில் பங்கேற்று வெற்றி பெறுபவா்களுக்கு முதல் பரிசு ரூ.10 ஆயிரம், இரண்டாம் பரிசு ரூ.7 ஆயிரம், மூன்றாம் பரிசு ரூ.5 ஆயிரம் வழங்கப்படும் என்று தெரிவிக்கப்பட்டுள்ளது.

ADVERTISEMENT
ADVERTISEMENT