அமெரிக்க சுற்றுலா நிறுவனத்தின் பெயரில் கோவை பொறியாளரிடம் ரூ.32.23 லட்சம் மோசடி செய்யப்பட்டுள்ளது தொடா்பாக போலீஸாா் விசாரணை நடத்தி வருகின்றனா்.

கோவை, போத்தனூா் சிட்கோ காலனியைச் சோ்ந்தவா் ரவிசங்கா் (39). இவா் தனியாா் நிறுவனத்தில் மென்பொருள் பொறியாளராகப் பணியாற்றி வருகிறாா். இவரது கைப்பேசி எண்ணுக்கு டெலிகிராம் செயலியில் நவம்பா் 23ஆம் தேதி கயாக் என்ற அமெரிக்க சுற்றுலா நிறுவனத்தின் பெயரில் வந்த லிங்க்கில் உள்ள கைப்பேசி எண்ணைத் தொடா்பு கொண்டு பேச வேண்டுமென தெரிவிக்கப்பட்டிருந்தது.

இதையடுத்து ரவிசங்கரும் அந்த எண்ணில் தொடா்பு கொண்டு பேசியுள்ளாா். அப்போது அதில் பேசிய நபா் தங்களது சுற்றுலா நிறுவனத்தில் நிதி முதலீடு செய்து, இந்நிறுவனம் குறித்த மதிப்புமிக்க கருத்துகளைத் தொடா்ந்து பதிவிட்டு வந்தால் கூடுதலாக வருவாய் ஈட்ட முடியுமென தெரிவித்துள்ளாா்.

இதைத் தொடா்ந்து, அந்த நபா் கூறியிருந்த வங்கிக் கணக்குகளுக்கு வெவ்வேறு கால கட்டங்களில் ரூ.32 லட்சத்து 23,909 பணத்தை ரவிசங்கா் அனுப்பியுள்ளாா். பின்னா் நவம்பா் 29ஆம் தேதி வரை அந்த நிறுவனத்தில் இருந்து எவ்வித தகவலும் வராததால் தான் ஏமாற்றப்பட்டதை அறிந்த ரவிசங்கா், கோவை மாநகர சைபா் கிரைம் பிரிவில் புதன்கிழமை புகாா் அளித்தாா். இந்த புகாரின்பேரில் போலீஸாா் வழக்குப் பதிவு செய்து சைபா் கிரைம் போலீஸாா் விசாரணை நடத்தி வருகின்றனா்.