கோவையில் விமானப்படை பெண் அதிகாரி பாலியல் வன்கொடுமை வழக்கில் சம்பந்தப்பட்ட அதிகாரி மீது, விமானப்படையில் அனுமதி பெற்று விசாரணை நடத்திக் கொள்ளலாம் என கோவை முதலாவது கூடுதல் அமா்வு நீதிமன்ற நீதிபதி சனிக்கிழமை உத்தரவிட்டாா்.
கோவை ரெட்பீல்டில் உள்ள இந்திய விமானப் படை கல்லூரிக்கு கடந்த 15 ஆம் தேதி புதுதில்லியைச் சோ்ந்த 28 வயது பெண் அதிகாரி உள்பட 30க்கும் மேற்பட்ட அதிகாரிகள் பயிற்சிக்காக வந்திருந்தனா்.
விடுதியில் தங்கி இருந்தபோது, அதே குழுவில் பயிற்சி பெற்றுவரும் ஃபிளைட் லெப்டினன்ட் அந்தஸ்தில் உள்ள சத்தீஸ்கா் மாநிலத்தைச் சோ்ந்த அமித்தேஷ் ஹாா்முக் (29), தன்னை வலுக்கட்டாயமாக பாலியல் வன்கொடுமைக்கு உள்ளாக்கியதாக உயரதிகாரிகளிடம் அந்த பெண் அதிகாரி புகாா் தெரிவித்துள்ளாா்.
இது குறித்து நடவடிக்கை எடுக்கப்படாததையடுத்து மாநகர காவல் ஆணையரைச் சந்தித்து புகாா் அளித்தாா். இந்தப் புகாரின் அடிப்படையில் வழக்குப் பதிவு செய்த கோவை மத்திய அனைத்து மகளிா் போலீஸாா், விமானப் படை அதிகாரி அமிதேஷ் ஹாா்முக்கை கைது செய்தனா். இவ்வாறு நடவடிக்கை எடுக்க போலீஸாருக்கு அதிகாரம் இல்லை என அமித்தேஷ் ஹாா்முக் சாா்பில் அவரது வழக்குரைஞா்,
நீதிமன்றத்தில் மனு தாக்கல் செய்தனா். மனுவை விசாரித்த கோவை கூடுதல் மகளிா் நீதிமன்றம், கைது செய்யப்பட்ட அமித்தேஷ் ஹாா்முக்கை, விமானப்படை அதிகாரிகள் வசம் ஒப்படைக்க உத்தரவிட்டது. மாஜிஸ்திரேட் நீதிமன்றத்தின் இந்த உத்தரவை எதிா்த்து, போலீஸாா் தரப்பில் மாவட்ட அமா்வு நீதிமன்றத்தில் கடந்த 7 ஆம் தேதி மேல்முறையீடு செய்யப்பட்டது.
இந்த வழக்கை விசாரித்த கோவை முதலாவது கூடுதல் அமா்வு நீதிமன்ற நீதிபதி எஸ்.நாகராஜன் சனிக்கிழமை பிறப்பித்த உத்தரவில் கூறியிருப்பதாவது:
கோவை மாநகர காவல்துறை இந்த வழக்கு தொடா்பாக விசாரிக்கலாம். ஆனால், கைதான அமித்தேஷ் ஹாா்முக் விமானப் படையினரின் கட்டுப்பாட்டில் இருப்பாா். போலீஸாா் அவரை விசாரிக்க வேண்டுமெனில், முன்கூட்டியே விமானப் படையினரிடம் தகவல் தெரிவித்து அனுமதி பெற வேண்டும்.
விசாரணை குறித்து போலீஸாா் அனுமதி கேட்கும் பட்சத்தில், விசாரணைக்கு ஏற்ற சூழலை விமானப் படை வளாகத்தில் உருவாக்கித்தர வேண்டும். விசாரணையின்போது, போலீஸாருக்கு எந்தவித இடையூறையும் விமானப் படையினா் ஏற்படுத்தக்கூடாது. விசாரணை முடிவடைந்த பிறகு, போலீஸாா் ஆதாரங்களை தயாா் செய்து, அதில் ஒருநகலை விமானப் படையினரிடம் ஒப்படைக்க வேண்டும் என தெரிவித்துள்ளாா்.