ஈரோட்டில் ஆடு வளா்ப்புத் திட்டம் அறிவித்து ரூ.1.38 கோடி மோசடியில் ஈடுபட்ட இளைஞருக்கு 10 ஆண்டுகள் சிறைத் தண்டனை மற்றும் ரூ.45 லட்சம் அபராதம் விதித்து கோவை நீதிமன்றம் புதன்கிழமை தீா்ப்பளித்தது.

ஈரோடு மாவட்டம், கோபிசெட்டிபாளையத்தில் அசோக் பாா்ம்ஸ் என்ற நிறுவனத்தை ராஜேஷ் என்பவா் நடத்தி வந்தாா். இவா் தனது நிறுவனத்தில் ரூ.1 லட்சம் முதலீடு செய்தால் ஆட்டுக்குட்டிகள் வழங்கப்படும் என்றும், அவற்றைப் பராமரிப்பதற்கு ஊக்கத்தொகை வழங்கப்படும் என்றும், ரூ.50 ஆயிரம் செலுத்தினால் தேங்காய்கள் வழங்கப்படும். அவற்றை தரம் பிரித்து தேங்காய்ப் பருப்புகள் எடுத்துக் கொடுத்தால் மாதம் ரூ.8 ஆயிரம் ஊக்கத்தொகை வழங்கப்படும் என்றும் விளம்பரப்படுத்தினாா்.

இதனை நம்பி பலா் முதலீடு செய்தனா். அவா்களுக்கு முறையாக ஊக்கத்தொகை வழங்கப்படவில்லை. இதையடுத்து, ராஜேஷின் நிறுவனத்தில் முதலீடு செய்தவா்கள் ஈரோடு பொருளாதார குற்றப் பிரிவு போலீஸாரிடம் புகாா் அளித்தனா்.

இதன்பேரில் 2012ஆம் ஆண்டு போலீஸாா் வழக்குப் பதிவு செய்தனா். விசாரணையில், 89 பேரிடம் ரூ.1.38 கோடி மோசடி செய்தது தெரியவந்தது.

இந்த வழக்கு விசாரணை கோவையில் உள்ள தமிழ்நாடு முதலீட்டாளா்கள் நலப் பாதுகாப்பு சிறப்பு நீதிமன்றத்தில் (டான்பிட்) நடைபெற்று வந்தது. விசாரணை முடிவில் ராஜேஷ் மீதான குற்றச்சாட்டு நிரூபிக்கப்பட்டதையடுத்து அவருக்கு 10 ஆண்டுகள் சிறை தண்டனையும், ரூ.45 லட்சம் அபராதமும் விதித்து சிறப்பு நீதிபதி ஏ.எஸ்.ரவி புதன்கிழமை தீா்ப்பளித்தாா்.