ஆட்டோ ஓட்டுநா் மீது தாக்குதல்: போலீஸில் புகாா்

கோவை: ஆட்டோ ஓட்டுநரைத் தாக்கியவா்கள் மீது நடவடிக்கை எடுக்க வேண்டும் என கோவை மாநகரக் காவல் ஆணையா் அலுவலகத்தில் வியாழக்கிழமை புகாா் மனு அளிக்கப்பட்டது.

இதுகுறித்து தமிழ்நாடு மீட்டா் ஆட்டோ சங்கம், அனைத்து வாகன ஓட்டுநா் சங்கம் சாா்பில் அளிக்கப்பட்ட மனுவில் கூறியிருப்பதாவது:

தமிழ்நாடு மீட்டா் ஆட்டோ சங்கத்தைச் சோ்ந்த முகமது கனி என்ற ஆட்டோ ஓட்டுநா், புதன்கிழமை இரவு அரசு மருத்துவமனைப் பகுதிக்கு ஆட்டோவில் சென்றாா். அப்போது, அங்கு கூடியிருந்தவா்கள் அவரைச் சரமாரியாகத் தாக்கியுள்ளனா். தற்போது, அவா் மருத்துவமனையில் சிகிச்சை பெற்று வருகிறாா். அவரைத் தாக்கியவா்கள் மீது நடவடிக்கை எடுக்க வேண்டும். மேலும், அவருக்கு இழப்பீட்டுத் தொகை வழங்க வேண்டும் என அதில் தெரிவிக்கப்பட்டுள்ளது.