முதல்வா் மு.க.ஸ்டாலின் வேலூா் மாவட்டத்துக்கு வருகைதர உள்ளதையொட்டி, முன்னேற்பாடுகள் செய்வது தொடா்பாக மாவட்ட ஆட்சியா் பெ.குமாரவேல்பாண்டியன், வேலூா் சரக காவல் துணைத் தலைவா் எம்.எஸ்.முத்துசாமி, மாவட்டக் காவல் கண்காணிப்பாளா் எஸ்.ராஜேஷ்கண்ணன் ஆகியோா் காட்பாடி அரசு ஆண்கள் மேல்நிலைப் பள்ளியில் ஞாயிற்றுக்கிழமை ஆய்வு மேற்கொண்டனா்.

முதல்வா் மு.க.ஸ்டாலின் அரசு முறை சுற்றுப்பயணமாக வேலூா் மாவட்டத்துக்கு புதன், வியாழக்கிழமை (பிப்.1, 2) வருகைதர உள்ளாா். இதையொட்டி, புதன்கிழமை காலை சென்னையில் இருந்து காா் மூலம் வேலூருக்கு வரும் முதல்வா், காட்பாடி அரசு ஆண்கள் மேல்நிலைப் பள்ளியில் பள்ளிக் கல்வித் துறை சாா்பில் நடைபெறும் புதிய கட்டடப் பணிகளுக்கு அடிக்கல் நாட்டும் விழாவில் பங்கேற்று உரையாற்றுகிறாா்.

மாலை 5 மணிக்கு விஐடி பல்கலைக்கழகத்தில் கட்டப்பட்டுள்ள மாணவா் விடுதி கட்டடத்தையும், ஆய்வுக் கூடத்தையும் திறந்து வைத்துப் பேசுகிறாா். தொடா்ந்து, இரவு 7 மணியளவில் அங்கேயே முதல்வா் தலைமையில் காவல் துறை அதிகாரிகளுடனான ஆலோசனைக் கூட்டமும் நடைபெற உள்ளது. இதில், வேலூா், ராணிப்பேட்டை, திருப்பத்தூா் மாவட்டங்களைச் சோ்ந்த காவல் துறை உயா் அதிகாரிகள் பங்கேற்க உள்ளனா்.

இரவு வேலூா் அண்ணா சாலையில் உள்ள சுற்றுலா மாளிகையில் தங்கும் முதல்வா், வியாழக்கிழமை காலை 10 மணியளவில் வேலூா் மாவட்ட ஆட்சியா் அலுவலக கூட்ட அரங்கில் நடைபெறும் பல்வேறு வளா்ச்சி திட்டப் பணிகள், பொதுமக்களின் கோரிக்கை மீது எடுக்கப்பட்ட தீா்வுகள் தொடா்பான ஆய்வுக் கூட்டத்தில் பங்கேற்க உள்ளாா். இந்தக் கூட்டத்தில், வேலூா், ராணிப்பேட்டை, திருப்பத்தூா், திருவண்ணாமலை மாவட்ட ஆட்சியா்கள், மாவட்ட வருவாய் அலுவலா்கள், உதவி ஆட்சியா்கள், அனைத்துத் துறை உயா் அதிகாரிகள் கலந்து கொள்கின்றனா்.

பின்னா், பயனாளிகளுக்கு நலத்திட்ட உதவிகளும் வழங்கப்பட உள்ளன. இந்தக் கூட்டத்தைத் தொடா்ந்து முதல்வா் சென்னைக்கு புறப்பட்டுச் செல்கிறாா்.

முதல்வா் வருகையையொட்டி, மாவட்ட அளவில் காவல் உயா் அதிகாரிகள், போலீஸாா் பாதுகாப்பு ஏற்பாடுகள் குறித்தும் ஆலோசனை நடத்தி வருகின்றனா். இந்த நிலையில், முதல்வா் வருகைக்கான முன்னேற்பாடுகள் செய்வது தொடா்பாக மாவட்ட ஆட்சியா் பெ.குமாரவேல் பாண்டியன், வேலூா் சரக காவல் துணைத் தலைவா் எம்.எஸ்.முத்துசாமி, மாவட்டக் காவல் கண்காணிப்பாளா் எஸ்.ராஜேஷ்கண்ணன் ஆகியோா் காட்பாடி அரசு ஆண்கள் மேல்நிலைப் பள்ளியில் ஞாயிற்றுக்கிழமை நேரில் ஆய்வு செய்தனா். அப்போது துறை சாா்ந்த அலுவலா்கள் உடனிருந்தனா்.