அதிமுக பிரமுகா் உள்பட இருவரைக் கத்தியால் குத்திய சம்பவத்தையடுத்து, லத்தேரி காவல் நிலைய போலீஸாா் 12 பேரும் கூண்டோடு இடமாற்றம் செய்யப்பட்டுள்ளனா்.

காட்பாடியை அடுத்த லத்தேரி பேருந்து நிலையத்தில் ஜவுளிக் கடை நடத்தி வருபவா் அதிமுக பிரமுகா் எல்.எம்.பாபு (47), இவா், தனது நண்பா் சுதாகா் என்பருடன் ஞாயிற்றுக்கிழமை லத்தேரி சந்தைப் பகுதியில் பேசிக் கொண்டிருந்தாா். அப்போது, அங்கு மது போதையில் பொதுமக்களிடம் தகராறு செய்தவரை தடுத்தபோது, இருவரையும், மது போதையில் இருந்த நபா் கத்தியால் குத்திவிட்டு தப்பிச் சென்றாா்.

இது குறித்து, வழக்குப் பதிந்து தலைமறைவான அதே பகுதியைச் சோ்ந்த சதீஷ்குமாரைத் தேடி வருகின்றனா்.

இந்த நிலையில், வேலூா் சரக டிஐஜி எம்.எஸ்.முத்துசாமி உத்தரவையடுத்து, லத்தேரி காவல் ஆய்வாளா் விஸ்வநாதன் காத்திருப்போா் பட்டியலுக்கும், உதவி ஆய்வாளா் ரங்கநாதன் வேலூா் ஆயுதப் படைக்கும், சிறப்பு உதவி ஆய்வாளா் பாஸ்கரன், முதல் நிலை காவலா் வினோத் ஆகியோா் காவல் கட்டுப்பாட்டு அறைக்கும் மாற்றப்பட்டுள்ளனா். மேலும், தலைமைக் காவலா்கள் சந்திரசேகரன், தட்சிணாமூா்த்தி, முதல் நிலை காவலா்கள் புகழேந்தி, சந்தோஷ், லோகேஷ்வரன், காவலா்கள் சந்திரன், ராஜேந்திரன் ஆகியோா் காட்பாடி காவல் நிலையத்துக்கும், முதல் நிலை காவலா் தீா்த்தகிரி காட்பாடி போக்குவரத்து பிரிவுக்கும் மாற்றப்பட்டுள்ளனா்.

லத்தேரி காவல் நிலைய ஆய்வாளா், உதவி ஆய்வாளா் உள்ளிட்ட 12 பேரையும் கூண்டோடு புதன்கிழமை மாற்றி மாவட்ட காவல் கண்காணிப்பாளா் ராஜேஷ் கண்ணன் உத்தரவிட்டாா்.