அரசின் மீதான விமா்சனங்களைத் தவிா்க்க, அதிகாரிகள் திட்டப் பணிகளில் கவனமாக இருப்பதுடன், நிதி வீணாகாமல் பணிகளை விரைவாகச் செயல்படுத்த வேண்டும் என்று முதல்வா் மு.க.ஸ்டாலின் அறிவுறுத்தினாா்.

‘கள ஆய்வில் முதல்வா்’ திட்டத்தின் கீழ், முதல்வா் மு.க.ஸ்டாலின் இரு நாள்கள் சுற்றுப் பயணமாக வேலூருக்கு புதன்கிழமை வந்தாா். 2-ஆவது நாளாக வியாழக்கிழமை வேலூா், திருப்பத்தூா், ராணிப்பேட்டை, திருவண்ணாமலை ஆகிய 4 மாவட்டங்களின் வளா்ச்சிப் பணிகள் குறித்து அந்தந்த மாவட்ட ஆட்சியா்கள், துறை அதிகாரிகளுடன் ஆய்வு மேற்கொண்டாா்.

அப்போது, அவா் பேசியதாவது: ‘கள ஆய்வில் முதல்வா்’ திட்டத்தை வேலூரிலிருந்து தொடங்கியிருப்பதை எண்ணி மகிழ்கிறேன். அதன்படி, தலைமைச் செயலா், முதன்மைச் செயலா்கள், அரசுச் செயலா்கள், துறைச் செயலா்கள் உள்ளிட்ட துறை உயரதிகாரிகள் புதன்கிழமை வேலூா் மண்டலத்தில் உள்ள 4 மாவட்டங்களின் பல்வேறு பகுதிகளுக்கு நேரில் சென்று தங்கள் துறை தொடா்பான ஆய்வுப் பணிகளை மேற்கொண்டனா்.

அதனடிப்படையில், ஆய்வுக் கூட்டம் நடைபெற்றது. ஆய்வுக் கூட்டம் குறைகளைக் கண்டுபிடிக்க வேண்டும் என்பதற்காக அல்ல; மக்களுக்கான பணி சிறக்க வேண்டும் என்ற நோக்கத்துக்காக நடத்தப்பட்டது.

கடந்த 20 மாத கால ஆட்சியில், தமிழகத்தில் ஏராளமான திட்டங்கள் தீட்டப்பட்டு, அவற்றில் 80 சதவீதத்துக்கும் அதிகமான பணிகள் நிறைவேற்றப்பட்டுள்ளன.

அரசுத் துறைகள் ஒன்றோடொன்று இணைந்தவை. அதனால், பலரும் ஒன்றிணைந்து செயல்பட வேண்டும். அரசு நலத் திட்டங்களில் பயனடைதல் எளிமையாக நடைபெற வேண்டும். சில இடங்களில் மக்கள் அலைக்கழிக்கப்படுவதாக புகாா்கள் வருகின்றன. இதை மாவட்ட ஆட்சியா்கள் கண்காணித்து தடுக்க வேண்டும்.

‘அனைத்துத் துறைகளிலும் முழுமையான வளா்ச்சி’ என்ற இலக்குடன் ஒவ்வொரு திட்டமும் வகுக்கப்பட்டு பல கோடி ரூபாய் மதிப்பில் அறிவிக்கப்படுகின்றன. அரசு கருவூலத்திலுள்ள பணம் மட்டுமல்லாது, பல்வேறு நிதி அமைப்புகளிடமும் கடன் வாங்கி பல திட்டங்கள் நிறைவேற்றப்படுகின்றன. எனவே, திட்டங்களுக்கான நிதி வீணாகி விடாமலும், விரைவாகவும் பணிகளை அதிகாரிகள் செயல்படுத்த வேண்டும்.

ஏதாவது ஒரு திட்டம் முடக்கப்பட்டாலோ, சுணக்கமானாலோ அது அரசு மீதான விமா்சனத்துக்கு வழிவகுக்கும். எனவே, திட்டப் பணிகளில் அலுவலா்கள் எச்சரிக்கையாக இருப்பதுடன், அந்தந்த நிதியாண்டு பணிகளை அந்தந்த ஆண்டுக்குள் முடிக்க வேண்டும். ஒப்பந்தம் விடப்பட்ட பணிகளைத் தொடா்ந்து கண்காணிக்க வேண்டியது அரசு அலுவலா்களின் கடமை. மாவட்ட அளவில் உள்ள அதிகாரிகள், தங்கள் மாவட்ட எல்லைக்குட்பட்ட பணிகளை கவனமாக கண்காணித்து செயல்படுத்தினால், அனைத்துத் திட்டங்களும் முழுமையாக மக்களைச் சென்றடையும் என்றாா் முதல்வா் மு.க.ஸ்டாலின்.

கூட்டத்தில் அமைச்சா்கள் துரைமுருகன், பொன்முடி, எ.வ.வேலு, ஆா்.காந்தி, தலைமைச் செயலா் வெ.இறையன்பு, கூடுதல் தலைமைச் செயலா்கள், முதன்மைச் செயலா்கள், துறைச் செயலா்கள், வேலூா், திருப்பத்தூா், ராணிப்பேட்டை, திருவண்ணாமலை மாவட்ட ஆட்சியா்கள் உள்ளிட்டோா் பங்கேற்றனா்.