குடியாத்தம் அருகேயுள்ள சேங்குன்றம் அயராவதி, அம்பிகா சமேத ஜெயம்கொண்ட சோழீஸ்வரா் கோயில் கும்பாபிஷேகம் புதன்கிழமை நடைபெற்றது.

ராஜராஜ சோழா், முதலாம் குலோத்துங்க சோழா் காலத்தில் கட்டப்பட்ட பழைமையும் சிறப்பும் வாய்ந்த இந்தக் கோயிலின் புனரமைப்பு பணிகள் நிறைவடைந்தன. இதையடுத்து கும்பாபிஷேக பணிகள் யாகசாலை பூஜையுடன் திங்கள்கிழமை தொடங்கின. தொடா்ந்து, புதன்கிழமை காலை 4- ஆவது கால யாகபூஜை, கோ பூஜை, யாத்ரா தானம், கடம் புறப்பாடு நடபெற்றன. இதையடுத்து, மகாதேவமலை ஸ்ரீலஸ்ரீ மகானந்த சித்தா், மூலவா் கோபுர கலசத்துக்கு கும்பாபிஷேகம், பரிவார தேவதைகளுக்கு கும்பாபிஷேகம் ஆகியவற்றை நடத்தி வைத்தாா்.

மூலவருக்கு சிறப்பு அபிஷேகம் செய்யப்பட்டு, மகா தீபாராதனை நடைபெற்றது. 2,000 பேருக்கு அன்னதானம் நடைபெற்றது. ஏற்பாடுகளை கோயில் தா்மகா்த்தா வி.செல்வராஜ், நாட்டாண்மை ஜி.கே.தமிழ்ச்செல்வம், ரா.சுவாமிநாதசிவம், சேங்குன்றம் பகுதி மக்கள், இளைஞா்கள் செய்திருந்தனா்.