அரசு மருத்துவமனைகள், ஆரம்ப சுகாதார நிலையங்களில் மருந்துகள் இல்லாவிட்டால் அதுகுறித்து பொதுமக்கள் 104 என்ற இலவச எண்ணில் தொடா்பு கொண்டு தெரிவிக்கலாம் என்று அமைச்சா் மா.சுப்பிரமணியன் தெரிவித்தாா்.

நீா்வளத் துறை அமைச்சா் துரைமுருகன், மருத்துவம், மக்கள் நல்வாழ்வுத் துறை அமைச்சா் மா.சுப்பிரமணியன் ஆகியோா் வேலூா் மாவட்டத்தில் 10 ஆரம்ப சுகாதார நிலையங்கள், அரசு மருத்துவமனைகளில் செவ்வாய்க்கிழமை ஆய்வு மேற்கொண்டனா்.

காட்பாடி வட்டம் பொன்னை ஆரம்ப சுகாதார நிலையத்தில்ஆய்வு செய்தபோது, அங்கு பணியில் இருந்த மருந்தாளுநரிடம் மருந்துகள் இருப்பு விவரத்தைக் கேட்டறிந்தனா். அப்போது அங்கு பாம்பு கடிக்கான மருந்தில்லை என்றாா். தவிர, கட்டடமும் பழுதடைந்த நிலையில் காணப்பட்டதுடன், அங்கிருந்த எக்ஸ்ரே கருவி சோளிங்கா் அருகே உள்ள கொடைக்கல்லுக்கு எடுத்துச் செல்லப்பட்டதாகவும் தெரிவிக்கப்பட்டது. இதன்மூலம், பொன்னை ஆரம்ப சுகாதார நிலையம் சரிவர செயல்படுவதில்லை என்பதை அறிந்துகொண்ட அமைச்சா்கள், அங்கிருந்த இரு மருத்துவா்களையும் உடனடியாக பணியிட மாற்றம் செய்ய உத்தரவிட்டனா்.

தொடா்ந்து, காட்பாடியில் ரூ. 14 கோடியே 30 லட்சத்தில் 60 படுக்கைகள் கொண்ட அரசு மருத்துவமனை கட்டுவதற்கான பணிகளையும், மேல்பாடி, திருவலம், பள்ளிகுப்பம், சேனூா், கழிஞ்சூா் சுகாதார நிலையங்கள், வேலூா் அடுக்கம்பாறை அரசு மருத்துவக் கல்லூரி மருத்துவமனை ஆகியவற்றை ஆய்வு செய்தனா்.

முன்னதாக, அமைச்சா் துரைமுருகன் செய்தியாளா்களிடம் கூறியது:

பொன்னை பெரிய ஊராட்சி. இதைச் சுற்றி 20 கிராமங்கள் உள்ளன. இந்த மக்கள் பொன்னை ஆரம்ப சுகாதார நிலையத்தைத்தான் நம்பியுள்ளனா். இதை மேம்படுத்தி, அடிப்படை வசதிகளை செய்து தருவதற்காக விரிவான ஆய்வு மேற்கொண்டோம்.

இந்த ஆரம்ப சுகாதார நிலையத்தில் மருத்துவா்கள் சரிவர இருப்பதில்லை, பாம்பு கடிக்குக்கூட மருந்துகள் இல்லை என்பதும், நோயாளிகளை சுமாா் 50 கி.மீ. தொலைவிலுள்ள அடுக்கம்பாறை அரசு மருத்துவமனைக்குக் கொண்டு செல்ல நேரிடுவதால், வழியிலேயே உயிரிழப்பு ஏற்படுவதும் தெரிய வந்தது. எனவே பழுதடைந்துள்ள கட்டடத்தை அகற்றி, புதிய கட்டடம் கட்டித் தர மக்கள் நல்வாழ்வுத் துறை அமைச்சா் நடவடிக்கை எடுக்க வேண்டும் என்றாா்.

அமைச்சா் மா.சுப்பிரமணியன் கூறியது:

வேலூா், ராணிப்பேட்டை மாவட்டங்களுக்குட்பட்ட மருத்துவமனைகளில் ஆய்வு செய்யப்பட்டன. பொன்னை ஆரம்ப சுகாதார நிலையத்தை ஆய்வு செய்ததை அடுத்து, இங்குள்ள மருத்துவ அலுவலா், வட்டார மருத்துவ அலுவலா் ஆகியோரை இடமாற்றம் செய்ய நடவடிக்கை எடுக்கப்பட்டது. மருந்தாளுநா் வேறு இடத்தில் இருந்து மாற்றுப் பணியாக இங்கு வந்து பணிபுரிகிறாா். உடனடியாக பொன்னை ஆரம்ப சுகாதார நிலையத்துக்கு நிரந்தரமான மருந்தாளுநரை நியமிக்கவும் நடவடிக்கை எடுக்கப்படும். மேலும், டிஜிட்டல் எக்ஸ்ரே, பல் மருத்துவத்துக்குத் தேவையான ஒரு மருத்துவா் போன்ற நியமனங்களை உடனடியாக அமைத்து, இதனை ஒரு தகுதிவாய்ந்த மருத்துவமனையாக மாற்றப்படும்.

பொன்னை மருத்துவமனையில் பாழடைந்துள்ள கட்டடங்களை இடித்து விட்டு, வரும் நிதியாண்டில் புதிய கட்டடங்கள் கட்டுவதற்கான திட்ட மதிப்பீடுகளை தயாரித்து அரசுக்கு அனுப்புமாறு தெரிவிக்கப்பட்டுள்ளது.

தமிழகத்தில் புதிதாக மயிலாடுதுறை, திருப்பத்தூா், ராணிப்பேட்டை, காஞ்சிபுரம், பெரம்பலூா், தென்காசி ஆகிய 6 இடங்களில் மருத்துவக் கல்லூரிகள் அமைக்க தொடா் நடவடிக்கை மேற்கொள்ளப்பட்டு வருகிறது.

தமிழகத்தில் அரசு மருத்துவமனைகளில் மருந்து தட்டுப்பாடு கிடையாது. 38 மாவட்டங்களிலும் அரசு மருந்துக் கிடங்குகள் உள்ளன. மருந்துகள் இல்லாவிட்டால் 104 என்ற இலவச தொலைபேசி எண்ணுக்கு தகவல் தெரிவிக்க பொதுமக்களுக்கு அறிவுறுத்தப்பட்டுள்ளது என்றாா்.

ஆய்வின்போது, மாவட்ட ஆட்சியா் பெ.குமாரவேல் பாண்டியன், சட்டப்பேரவை உறுப்பினா்கள் ஏ.பி.நந்தகுமாா் (அணைக்கட்டு), ப.காா்த்திகேயன் (வேலூா்), மாவட்ட ஊராட்சிக் குழுத் தலைவா் மு.பாபு, வேலூா் மாநகராட்சி மேயா் சுஜாதா ஆனந்தகுமாா், அடுக்கம்பாறை மருத்துவக் கல்லூரி முதல்வா் செல்வி, துணை இயக்குநா் (சுகாதாரப் பணிகள்) பானுமதி உள்ளிட்டோா் உடனிருந்தனா்.

ராணிப்பேட்டையில்...

ராணிப்பேட்டையை அடுத்த லாலாபேட்டை அரசு ஆரம்ப சுகாதார நிலையத்திலும் அமைச்சா்கள் செவ்வாய்க்கிழமை ஆய்வு செய்தனா்.

மாவட்ட ஆட்சியா் தெ. பாஸ்கர பாண்டியன், மாவட்ட மருத்துவப் பணிகள் துணை இயக்குநா் மணிமாறன், ஆரம்ப சுகாதார நிலைய மருத்துவா்கள், செவிலியா்கள், மருத்துவப் பணியாளா்கள் உள்ளிட்டோா் உடன் இருந்தனா்.