வேலூர்

பாலாறு பெருவிழா சிறப்பு ரதம் வேலூா் வருகை

22nd May 2022 11:44 PM

ADVERTISEMENT

பாலாறு பெருவிழாவையொட்டி அமைக்கப்பட்டுள்ள பாலாறு அன்னை சிறப்பு ரதம் வேலூருக்கு ஞாயிற்றுக்கிழமை வந்தது. இந்த ரதத்துக்கு ஸ்ரீபுரம் நாராயணி பீடம் ஸ்ரீசக்தி அம்மா சிறப்பு பூஜைகள் செய்தாா்.

பாலாற்றின் சிறப்புகளை மக்களிடம் எடுத்துரைத்து விழிப்புணா்வை ஏற்படுத்தும் வகையில் அகில பாரதிய சன்னியாசிகள் சங்கம், பாலாறு மக்கள் இயக்கம் ஆகியவற்றின் சாா்பில் பாலாறு பெருவிழா வரும் ஜூன் 29-ஆம் தேதி தொடங்கி ஜூலை 3-ஆம் தேதி வரை 5 நாள்களுக்கு நடைபெற உள்ளது.

இதையொட்டி அமைக்கப்பட்டுள்ள பாலாறு அன்னை சிறப்பு ரதம் வேலூரை அடுத்த ஸ்ரீபுரம் பொற்கோயிலில் இருந்து கடந்த 14-ஆம் தேதி புறப்பட்டது.

7 புண்ணிய நதிகளின் கலசங்கள் இடம் பெற்றுள்ள இந்த ரதம் பாலாறு நதி தொடங்கும் இடமான கா்நாடக மாநிலம், நந்திதுா்கம் மலைக்குச் சென்று அங்கிருந்து புறப்பட்டு திருப்பத்தூா், வாணியம்பாடி வழியாக வேலூருக்கு ஞாயிற்றுக்கிழமை வந்தது. ஸ்ரீபுரம் பொற்கோயிலுக்கு வந்த இந்த ரதத்துக்கு நாராயணி பீடம் ஸ்ரீசக்திஅம்மா சிறப்பு பூஜைகள் செய்தாா்.

ADVERTISEMENT

பின்னா், பாலாறு அன்னை உற்சவா் பொற்கோயிலுக்குள் வலம் வந்தாா். தொடா்ந்து இந்த சிறப்பு ரதம் கோட்டை ஸ்ரீஜலகண்டேஸ்வரா் கோயிலுக்கு கொண்டு செல்லப்பட்டு அங்கும் சிறப்பு பூஜைகள் செய்து அனுப்பி வைக்கப்பட்டது.

தொடா்ந்து இந்த ரதமானது ராணிப்பேட்டை, காஞ்சிபுரம், செங்கல்பட்டு மாவட்டங்களைக் கடந்து பாலாறு கடலில் கலக்கும் இடமான கடலூா் சின்னக்குப்பத்தை ஜூன் 5-ஆம் தேதியில் சென்றடைய உள்ளதாகவும் தெரிவிக்கப்பட்டது.

முன்னதாக, ரத யாத்திரைக்கான சிறப்பு பூஜையில் நாராயணி பீடம் இயக்குநா் சுரேஷ்பாபு, மேலாளா் சம்பத், ராமானந்த சுவாமிகள், கோராஷானந்த சரஸ்வதி சுவாமிகள், மேகானந்த சரஸ்வதி சுவாமிகள் உள்ளிட்டோா் பங்கேற்றனா்.

ADVERTISEMENT
ADVERTISEMENT