வேலூர்

வேலூா், ராணிப்பேட்டை, திருப்பத்தூரில் குடியரசு தின விழா: ஆட்சியா்கள் கொடியேற்றிநலத்திட்ட உதவிகள் வழங்கினா்

27th Jan 2022 12:47 AM

ADVERTISEMENT

 

வேலூா்/ராணிப்பேட்டை/திருப்பத்தூா்: குடியரசு தினத்தையொட்டி வேலூா், திருப்பத்தூா், ராணிப்பேட்டை மாவட்ட ஆட்சியா்கள் தேசியக்கொடிகளை ஏற்றி வைத்து சிறப்பாக செயலாற்றிய பல்வேறு துறைகளைச் சோ்ந்த 666 பேருக்கு பாராட்டுச் சான்றிதழ்களை வழங்கினா்.

73-ஆவது குடியரசு தினத்தை முன்னிட்டு வேலூா் கோட்டை வளாகத்தில் உள்ள காந்தியடிகள் சிலைக்கு மாவட்ட ஆட்சியா் பெ.குமாரவேல் பாண்டியன் மாலை அணிவித்து மரியாதை செலுத்தியதுடன், கோட்டை கொத்தளத்தில் தேசியக் கொடி ஏற்றி வைத்தாா்.

பின்னா், நேதாஜி விளையாட்டரங்கில் நடந்த விழாவிலும் தேசியக் கொடியை ஏற்றி வைத்து மாவட்ட காவல் கண்காணிப்பாளா் எஸ்.ராஜேஷ்கண்ணன் தலைமையிலான போலீஸாரின் அணிவகுப்பு மரியாதையையும் ஏற்றுக் கொண்டாா். பின்னா், முதல்வரின் காவலா் நற்பணி பதக்கம் பெற்ற 48 காவலா்களுக்கு பதக்கங்கள், சிறப்பாக பணியாற்றிய பல்வேறு அரசுத்துறை அலுவலா்கள் 106 பேருக்கும், கல்வி நிறுவனங்களைச் சோ்ந்த தலைவா்கள் 8 பேருக்கும், விளையாட்டு வீரா்கள் 8 பேருக்கும் பாராட்டுச் சான்றிதழ்களையும் வழங்கினாா்.

ADVERTISEMENT

இதில், வேலூா் சரக காவல் துணைத்தலைவா் ஜ.ஆனிவிஜயா, வேலூா் சட்டப்பேரவை உறுப்பினா் ப.காா்த்திகேயன், உதவி ஆட்சியா் (பயிற்சி) ஆா்.ஐஸ்வா்யா, ‘மாவட்ட வருவாய் அலுவலா் கே.ராமமூா்த்தி, ஊரக வளா்ச்சி முகமை திட்டஇயக்குநா் க.ஆா்த்தி, வருவாய் கோட்டாட்சியா் விஷ்ணுபிரியா உள்ளிட்டோா் பங்கேற்றனா்.

திருப்பத்தூரில்...

இதேபோல், திருப்பத்தூா் மாவட்டம், ஜோலாா்பேட்டை ஒன்றியம் பாச்சல் கிராமத்தில் உள்ள ஆயுதப்படை மைதானத்தில் நடைபெற்ற விழாவில் ஆட்சியா் அமா் குஷ்வாஹா தேசியக் கொடியை ஏற்றி வைத்து மாவட்ட காவல் கண்காணிப்பாளா் கி.பாலகிருஷ்ணன் தலைமையில் காவலா் அணிவகுப்பு மரியாதையை ஏற்றுக்கொண்டாா். மேலும், முதல்வரின் காவலா் நற்பணி பதக்கம் பெற்ற 21 காவலா்களுக்கு பதக்கங்கள் உள்பட பல்வேறு அரசுத் துறைகளில் சிறப்பாக பணியாற்றிய அலுவலா்கள் 158 பேருக்கு பாராட்டுச் சான்றிதழ்கள் வழங்கப்பட்டன. தொடா்ந்து பல்வேறு அரசுத்துறைகள் சாா்பில் மொத்தம் 395 பயனாளிகளுக்கு ரூ.1 கோடியே 47 லட்சத்து 74 ஆயிரத்து 139 மதிப்பிலான நலத்திட்ட உதவிகளும் வழங்கப்பட்டன.

மாவட்ட வருவாய் அலுவலா் என்.சி.ஈ.தங்கய்யாபாண்டியன், வருவாய் கோட்டாட்சியா்கள் லட்சுமி, காயத்ரி சுப்பிரமணி, ஆட்சியரின் நோ்முக உதவியாளா்கள் வில்சன் ராஜசேகா், ஹரிஹரன், தனித்துணை ஆட்சியா் கிருஷ்ணமூா்த்தி, வேளாண் இணை இயக்குநா் ராஜசேகா், சுகாதார மாவட்ட துணை இயக்குநா் செந்தில் உள்ளிட்டோா் பங்கேற்றனா்.

ராணிப்பேட்டையில்...

ராணிப்பேட்டை அரசு மேல்நிலைப் பள்ளியில் நடைபெற்ற விழாவில் மாவட்ட ஆட்சியா் தெ.பாஸ்கரபாண்டியன் தேசியக்கொடி ஏற்றி வைத்து மாவட்ட காவல் கண்காணிப்பாளா் தீபாசத்யன் தலைமையில் காவலா்களின் அணிவகுப்பு மரியாதையை ஏற்றுக்கொண்டாா். தொடா்ந்து , முதல்வரின் நற்பணி பதக்கம் பெற்ற 19 காவலா்களுக்கு பதக்கங்கள் உள்பட பல்வேறுதுறைகளில் சிறப்பாக பணியாற்றிய 338 அலுவலா்களுக்கு பாராட்டுச் சான்றிதழ் வழங்கினாா். மேலும், பல்வேறு அரசுத்துறைகள் சாா்பில் மொத்தம் 54 பயனாளிகளுக்கு ரூ.37 லட்சத்து 96 ஆயிரத்து 184 மதிப்பிலான நலத்திட்ட உதவிகளும் வழங்கப்பட்டன.

இதில் மாவட்ட வருவாய் அலுவலா் நூ.ஷேமுஹம்மதுஅஸ்லம், கோட்டாட்சியா்கள் பூங்கொடி, சிவதாசு உள்பட பல்வேறு அரசு அதிகாரிகள் பங்கேற்றனா்.

ADVERTISEMENT
ADVERTISEMENT