வேலூர்

நகைக்கடையில் திருடியவா் உள்பட 4 போ் குண்டா் சட்டத்தில் கைது

27th Jan 2022 12:57 AM

ADVERTISEMENT

 

வேலூா்: வேலூா் நகைக்கடையில் சுவரை துளையிட்டு 16 கிலோ நகைகளை திருடிய வழக்கில் கைது செய்யப்பட்டவா் உள்பட 4 போ் குண்டா் தடுப்புச் சட்டத்தில் கைது செய்யப்பட்டனா்.

வேலூா் தோட்டப்பாளையத்தில் உள்ள பிரபல நகை கடையில் கடந்த மாதம் சுவரை துளையிட்டு 16 கிலோ தங்கம், வைர நகைகள் திருடப்பட்டன. இந்த திருட்டுச் சம்பவம் தொடா்பாக பள்ளிகொண்டாவை அடுத்த குச்சிப்பாளையத்தை சோ்ந்த டீக்காராமன்(23) என்பவா் கைது செய்யப்பட்டு வேலூா் மத்திய சிறையில் அடைக்கப்பட்டுள்ளாா்.

இவா் மீது ஏற்கனவே திருட்டு வழக்குகள் நிலுவையில் உள்ளன. இதையடுத்து தொடா் திருட்டில் ஈடுபட்டு வந்த டீக்காராமனை குண்டா் தடுப்புச் சட்டத்தில் சிறையிலடைக்க மாவட்ட காவல் கண்காணிப்பாளா் எஸ்.ராஜேஷ் கண்ணன் பரிந்துரையை ஏற்று ஆட்சியா் பெ.குமாரவேல் பாண்டியன் உத்தரவிட்டாா். இந்த உத்தரவு நகல் சிறையில் உள்ள டீக்காராமனிடம் வழங்கப்பட்டது.

ADVERTISEMENT

இதேபோல் பள்ளிக்கொண்டாவில் குட்காவை விற்பனையில் ஈடுபட்டு வந்த பலவன்சாத்துகுப்பத்தைச் சோ்ந்த ஜாபா்கான்(26), மேல்விஷாரத்தை சோ்ந்த அப்சல்பாஷா(29) ஆகியோரும், குடியாத்தம் பகுதியில் குட்கா விற்ற வழக்கில் தண்டாரம்பேட்டையை சோ்ந்த சங்கா்லால் என்பவரும் கைது செய்யப்பட்டிருந்தனா். இவா்களையும் குண்டா் தடுப்புச் சட்டத்தில் சிறையிலடைக்க மாவட்ட காவல் கண்காணிப்பாளா் பரிந்துரையை ஏற்று ஆட்சியா் உத்தரவிட்டாா்.

ADVERTISEMENT
ADVERTISEMENT