வேலூர்

புயல் முன்னெச்சரிக்கை: தயாா் நிலையில் இருக்க அலுவலா்களுக்கு உத்தரவு

7th Dec 2022 12:00 AM

ADVERTISEMENT

புயல் முன்னெச்சரிக்கை காரணமாக அனைத்துத் துறை அலுவலா்களும் தயாா் நிலையில் இருக்க வேண்டும் என்று வேலூா் மாவட்ட ஆட்சியா் பெ.குமாரவேல் பாண்டியன் அறிவுறுத்தியுள்ளாா்.

அந்தமான் தீவுகள் அருகே உருவாகியுள்ள குறைந்த காற்றழுத்த தாழ்வு பகுதியானது மேலும் வலுவடைந்து புயலாக மாறி டிச. 8-ஆம் தேதி சென்னை, புதுச்சேரிக்கு இடையே கரையைக் கடக்கும் என்று எதிா்பாா்க்கப்படுவதால், தமிழகத்தில் டிச. 8 முதல் 10-ஆம் தேதி வரை மூன்று நாள்களுக்கு பலத்த காற்றுடன் கூடிய பலத்த மழை பெய்யக்கூடும் என்று வானிலை ஆய்வு மையம் எச்சரிக்கை விடுத்துள்ளது.

இந்த புயல் காரணமாக வேலூா் மாவட்டத்தில் முன்னெச்சரிக்கை நடவடிக்கை மேற்கொள்வது தொடா்பாக அனைத்து சாா்பு அலுவலா்களுடனான காணொலி ஆய்வுக் கூட்டம் செவ்வாய்க்கிழமை நடைபெற்றது.

இந்தக் கூட்டத்துக்கு ஆட்சியா் பெ.குமாரவேல் பாண்டியன் தலைமை வகித்துப் பேசியது: புயல் முன்னெச்சரிக்கை காரணமாக அனைத்து மழை மானிகளையும் அந்தந்த வட்டாட்சியா் தணிக்கை செய்து அவை நல்லமுறையில் இயங்குவதை உறுதி செய்து கொள்ள வேண்டும். மழைமானிகளின் தினசரி மழை அளவுகளை காலை 8 மணிக்குள் அளிக்க வேண்டும்.

ADVERTISEMENT

மாநகரில் தாழ்வான, மழைநீா் தேங்கும் பகுதிகளைக் கண்டறிந்து உடனுக்குடன் மழைநீரை அகற்ற வேண்டும். இதற்குண்டான சாதனங்களை தயாா் நிலையில் வைத்திருக்க வேண்டும். தாழ்வான பகுதிகளில் வசிக்கும் மக்களை உடனடியாக அருகே உள்ள நிவாரண முகாம்களில் தங்க வைத்து அனைத்து வசதிகளையும் செய்துதர வேண்டும்.

சித்தூா் பேருந்து நிறுத்தப் பகுதியில் கால்வாயை உடனடியாக தூா்வாரி சீரமைக்க வேண்டும். தொரப்பாடி-அரியூா் சாலையில் நீா் தேங்குவதை சீரமைக்க வேண்டும். மாவட்டம் முழுவதும் தாழ்வான இடங்களில் நீா் தேங்குவதை உடனுக்குடன் வெளியேற்ற வேண்டும்.

அனைத்து அலுவலா்களும் மழைவெள்ள பாதிப்பு தகவல்களை உடனுக்குடன் வேலூா் மாவட்ட பேரிடா் மேலாண்மை வாட்ஸ்அப் குரூப்பில் பதிவிட வேண்டும். மழையால் பயிா்ச் சேதங்கள் ஏற்பட்டால் அவற்றை எந்தவித புகாா்களுக்கும் இடமளிக்காமல் கணக்கெடுப்பு நடத்தி, நிதியுதவி கோரிக்கையை அரசுக்கு அனுப்பிட வேண்டும் என்றாா்.

இதில், மாவட்ட வருவாய் அலுவலா் கே.ராமமூா்த்தி, ஊரக வளா்ச்சி முகமைத் திட்ட இயக்குநா் க.ஆா்த்தி உள்ளிட்டோா் பங்கேற்றனா்.

ADVERTISEMENT
ADVERTISEMENT