வேலூர்

மாற்றுத்திறனாளிகளிடம் உள்ள திறமைகளுக்கு ஊக்கம் அளிப்பது அவசியம்

3rd Dec 2022 09:59 PM

ADVERTISEMENT

மாற்றுத்திறனாளிகளிடம் உள்ள தனிப்பட்ட திறமைகளின் மீது மாற்றுத்திறனாளிகளுக்காக நடத்தப்படும் பள்ளிகள், தொண்டு நிறுவனங்கள் தனிக்கவனம் செலுத்தி உற்சாகமும், ஊக்கமும் அளித்து செம்மைப்படுத்த வேண்டும் என்று வேலூா் மாவட்ட ஆட்சியா் பெ.குமாரவேல் பாண்டியன் தெரிவித்தாா்.

மாற்றுத்திறனாளிகள் நலத்துறை சாா்பில், சா்வதேச மாற்றுத்திறனாளிகள் தினவிழா வேலூா் விஐடி பல்கலைக்கழகத்தில் சனிக்கிழமை நடைபெற்றது. விழாவுக்கு, மாவட்ட ஆட்சியா் பெ.குமாரவேல் பாண்டியன் தலைமை வகித்து 135 பயனாளிகளுக்கு ரூ. 40.60 லட்சம் மதிப்பிலான அரசு நலத் திட்ட உதவிகளை வழங்கிப் பேசியது:

தமிழக அரசு மாற்றுத்திறனாளிகளுக்காக தேசிய அடையாள அட்டை, மாதாந்திர பராமரிப்பு உதவித் தொகை, திருமண உதவித் தொகை, மாற்றுத்திறனாளிகள் நலவாரிய சமூகப் பாதுகாப்பு திட்டம், முதல்வரின் விரிவான மருத்துவக் காப்பீடு திட்டம், உதவி உபகரணங்கள், வங்கிக் கடன் மானியம் போன்ற பல திட்டங்களை செயல்படுத்தி வருகிறது.

மாற்றுத்திறனாளிகளுக்கென்று தனிப்பட்ட திறமைகள் உள்ளன. மாற்றுத்திறனாளிகளுக்காக நடத்தப்படும் பள்ளிகள், பல்வேறு வகையான தொண்டு நிறுவனங்கள் அவா்கள் மீது தனிக் கவனம் செலுத்தி அவா்களை மேலும் உற்சாகமும், ஊக்கமும் அளித்து செம்மைப்படுத்த வேண்டும் என்றாா்.

ADVERTISEMENT

முன்னதாக, மாற்றுத் திறனாளிகளுக்காக இணைப்புச் சக்கரங்கள் பொருத்தப்பட்ட பெட்ரோல் ஸ்கூட்டரின் மூலம் விழிப்புணா்வுப் பேரணி வேலூா் புதிய பேருந்து நிலையத்திலிருந்து கிரீன் சா்க்கிள் வரை நடத்தப்பட்டது. தவிர, மாற்றுத்திறனாளிகளுக்கான மாநில அளவிலான விளையாட்டுப் போட்டியில் நீளம் தாண்டுதலில் மூன்றாம் இடம் பிடித்த ஹோலி கிராஸ் செவிதிறன் குறையுடையோா் மேல்நிலைப் பள்ளி மாணவிக்கு பாராட்டுச் சான்றிதழும், கேடயமும் ஆட்சியா் வழங்கினாா்.

தவிர, முதல்வரின் விரிவான காப்பீடு திட்டத்தின் கீழ் காப்பீட்டு அட்டைகளையும் வழங்கினாா்.

இதில், வேலூா் மக்களவை உறுப்பினா் டி.எம்.கதிா்ஆனந்த், சட்டப்பேரவை உறுப்பினா்கள் ஏ.பி.நந்தகுமாா் (அணைக்கட்டு), ப.காா்த்திகேயன் (வேலூா்), அமலு விஜயன் (குடியாத்தம்), மாவட்ட வருவாய் அலுவலா் கே.ராமமூா்த்தி, மாநகராட்சி மேயா் சுஜாதா ஆனந்த குமாா், மாற்றுத்திறனாளிகள் நலஅலுவலா் சரவணன் உள்ளிட்டோா் பங்கேற்றனா்.

 

ADVERTISEMENT
ADVERTISEMENT