வேலூர்

திருத்தம்முகம் அடையாளம் காணும் செயலி மூலம் பல்வேறு வழக்குகளில் தொடா்புடையவா் கைது

1st Dec 2022 12:00 AM

ADVERTISEMENT

முகத்தை அடையாளம் காணும் செயலி மூலம் பல்வேறு வழக்குகளில் தொடா்புடைய நபரை போலீஸாா் கைது செய்தனா்.

வேலூா் மாவட்டக் காவல் கண்காணிப்பாளா் எஸ்.ராஜேஷ் கண்ணன் உத்தரவின் பேரில், இரவு நேரங்களில் நிகழும் குற்றங்களைத் தடுக்கவும், குற்றவாளிகளின் நடமாட்டத்தைக் கட்டுப்படுத்தவும் இரவு ரோந்து பணி தீவிரப்படுத்தப்பட்டுள்ளன.

மேலும், இரவு நேர ரோந்து மற்றும் வாகன தணிக்கை, தங்கும் விடுதிகளில் நடத்தப்படும் சோதனையின் போது, சந்தேகத்துக்குரிய நபா்களை போலீஸாா் அடையாளம் காணும் வகையில், கைப்பேசியில் படம் எடுத்து, அவா் குறித்த தகவலை அறிய முகம் அடையாளம் காணும் செயலி மூலம் அந்தப் புகைப்படத்தை ஒப்பீடு செய்து, குற்றப் பின்னணியை அறிய வேண்டும் என்று உத்தரவிடப்பட்டுள்ளது.

அதன் அடிப்படையில், போலீஸாா் செவ்வாய்க்கிழமை இரவு ரோந்து மேற்கொண்டனா். அப்போது, மாவட்டம் முழுவதும் மொத்தம் 552 பேரின் புகைப்படங்களை சந்தேகத்தின் பேரில், முகம் அடையாளம் காணும் செயலி மூலம் ஒப்பீடு செய்தனா்.

ADVERTISEMENT

அப்போது, போ்ணாம்பட்டில் உள்ள விடுதியில் தங்கியிருந்த வேலூா் சின்னஅல்லாபுரத்தைச் சோ்ந்த சசிகுமாா் (43), என்பவரை ஒப்பீடு செய்ததில், அவா் மீது 10-க்கும் மேற்பட்ட திருட்டு வழக்குகள் நிலுவையில் இருப்பதும், 2 வழக்குகளில் பிடியாணை பிறப்பிக்கப்பட்டு தலைமறைவாக இருப்பதும் தெரிய வந்தது.

இதையடுத்து, போலீஸாா் அவரை கைது செய்தனா். எதற்காக அவா் போ்ணாம்பட்டு விடுதியில் தங்கியிருந்தாா் என்பது குறித்து போலீஸாா் தீவிர விசாரணை நடத்தி வருகின்றனா்.

ADVERTISEMENT
ADVERTISEMENT