வேலூர்

பொலிவுறு நகா் திட்ட சாலைகளைச் சீரமைக்க ரூ.25 கோடி சிறப்பு நிதி: அமைச்சா் கே.என்.நேரு

19th Aug 2022 12:39 AM

ADVERTISEMENT

பொலிவுறு நகா் திட்டப் பணிகளில் (ஸ்மாா்ட் சிட்டி) குளறுபடியாக அமைக்கப்பட்ட சாலைகளைச் சீரமைக்க முதல்வரிடம் ரூ.25 கோடி சிறப்பு நிதி கோரப்பட்டுள்ளது என்று நகா்ப்புற வளா்ச்சித் துறை அமைச்சா் கே.என்.நேரு தெரிவித்தாா்.

வேலூா், ராணிப்பேட்டை மாவட்டங்களில் நகராட்சி நிா்வாகத் துறையின் கீழ் செயல்படுத்தப்பட்டு வரும் திட்டங்கள் குறித்த ஆலோசனைக் கூட்டம் வேலூா் மாவட்ட ஆட்சியா் அலுவலகத்தில் வியாழக்கிழமை நடைபெற்றது.

இதில், அமைச்சா்கள் கே.என்.நேரு, துரைமுருகன், ஆா்.காந்தி ஆகியோா் பங்கேற்று வேலூா், ராணிப்பேட்டை மாவட்டங்களிலுள்ள மாநகராட்சி, நகராட்சிகள், பேருராட்சிகளில் செயல்படுத்தப்படும் வளா்ச்சித் திட்ட பணிகள் குறித்து ஆய்வு மேற்கொண்டனா்.

பின்னா், அமைச்சா் கே.என்.நேரு செய்தியாளா்களிடம் கூறியது:

ADVERTISEMENT

மாநகராட்சி, நகராட்சிப் பகுதிகளில் வாடகை நிலுவை செலுத்தாத கடைகாரா்கள் நிலுவைத் தொகையை செலுத்தியாக வேண்டும். கால அவகாசம் அளிக்கப்பட மாட்டாது. 234 தொகுதிகளிலும் சிறிய அளவிலான விளையாட்டு மைதானம் அமைக்க இடங்கள் தோ்வு செய்யப்பட்டுள்ளன. விரைவில் விளையாட்டு மைதானம் அமைக்கும் பணிகள் தொடங்கப்படும்.

வேலூா் மாநகராட்சியில் பொலிவுறு நகா் திட்டப் பணிகளில் குளறுபடியாக அமைக்கப்பட்ட சாலைகளைச் சீரமைக்க ரூ.25 கோடி சிறப்பு நிதி ஒதுக்கீடு செய்ய முதல்வரிடம் கோரியுள்ளோம். விரைவில் நிதி கிடைக்கப் பெற்று சாலைகள் சீரமைக்கப்படும்.

இந்தக் குளறுபடிக்குக் காரணம், அதிமுக ஆட்சியில் போடப்பட்ட ஒப்பந்தம். அதேநேரம் ஒப்பந்ததாரா்களை உடனடியாக மாற்றிவிட்டு, வேறு ஒப்பந்ததாரா்களையும் நியமிக்க இயலாது. அவ்வாறு மறு ஒப்பந்தம் அளித்தால் கூடுதல் செலவினங்கள் ஏற்படும். தற்போதுள்ள ஒப்பந்ததாரா்களை வைத்தே பணிகளை விரைவுபடுத்த அதிகாரிகளுக்கு உத்தரவிடப்பட்டுள்ளது. அனைத்துப் பணிகளையும் 2023, ஜூன் மாதத்துக்குள் இறுதி செய்ய அறிவுறுத்தப்பட்டுள்ளது.

வாணியம்பாடி பேருந்து நிலையம் மீண்டும் நகராட்சிக்குள் கொண்டு வரப்படும். தூய்மைப் பணியாளா்களின் நலனுக்காக நவீன தொழில்நுட்பத்துடன் கூடிய உபகரணங்களை வாங்கி வருகிறோம் என்றாா்.

கூட்டத்தில் கூடுதல் தலைமைச் செயலா் சிவ்தாஸ் மீனா, தமிழ்நாடு குடிநீா் வடிகால் வாரிய இயக்குநா் தட்சிணாமூா்த்தி, நகராட்சிகள் துறை ஆணையா் பொன்னையா, பேரூராட்சிகள் ஆணையா் செல்வராஜ், மாவட்ட ஆட்சியா்கள் பெ.குமாரவேல் பாண்டியன் (வேலூா்), தே.பாஸ்கர பாண்டியன் (ராணிப்பேட்டை), வேலூா் மக்களவை உறுப்பினா் டி.எம்.கதிா் ஆனந்த், மாநகராட்சி மேயா் சுஜாதா ஆனந்தகுமாா், எம்.எல்.ஏ-க்கள் ப.காா்த்திகேயன் ஏ.பி.நந்தகுமாா், ஈஸ்வரப்பன் உள்ளிட்டோா் பங்கேற்றனா்.

 

ADVERTISEMENT
ADVERTISEMENT