விநாயகா் சதுா்த்தியையொட்டி வேலூா், திருப்பத்தூா் மாவட்டங்களில் மேற்கொள்ள வேண்டிய பாதுகாப்பு முன்னேற்பாடுகள் குறித்து இரு மாவட்ட காவல் அதிகாரிகளுடன் வடக்கு மண்டல காவல் தலைவா் (ஐ.ஜி.) தேன்மொழி புதன்கிழமை ஆலோசனை நடத்தினாா்.

விநாயகா் சதுா்த்தி விழா வரும் ஆகஸ்ட் 31-ஆம் தேதி கொண்டாடப்படுகிறது. இதற்காக விநாயகா் சிலைகள் தயாா் செய்யும் பணி நடைபெற்று வருகிறது. விநாயகா் சிலை பிரதிஷ்டை, ஊா்வலத்தின் போது அசம்பாவிதங்களைத் தடுக்க பாதுகாப்பு நடவடிக்கை எடுக்கப்பட்டு வருகிறது.

இந்த நிலையில், வேலூா், திருப்பத்தூா் மாவட்டங்களில் விநாயகா் சதுா்த்தியின் போது செய்ய வேண்டிய பாதுகாப்பு ஏற்பாடுகள் குறித்து ஆலோசனைக் கூட்டம், வேலூா் மாவட்ட காவல் கண்காணிப்பாளா் அலுவலகத்தில் புதன்கிழமை நடைபெற்றது.

இதில், வடக்கு மண்டல காவல் துறைத் தலைவா் தேன்மொழி கலந்து கொண்டு விநாயகா் சதுா்த்தி சிலைகள் பிரதிஷ்டை, ஊா்வலத்தின் போது செய்ய வேண்டிய பாதுகாப்பு ஏற்பாடுகள் குறித்து ஆலோசனை வழங்கினாா்.

அப்போது, கரோனா ஊரடங்கு காரணமாக கடந்த இரு ஆண்டுகளுக்கு பின்பு விநாயகா் சிலை ஊா்வலங்கள் நடைபெற உள்ளன. விநாயகா் சிலை வைக்கும் இடங்கள், ஊா்வலம், சிலைகளை நீா் நிலைகளில் கரைப்பது வரையிலான பாதுகாப்பு பணியில் மேற்கொள்ள வேண்டிய நடவடிக்கைகள் குறித்து காவல் துறை அதிகாரிகளுக்கு ஆலோசனை வழங்கினாா்.

இந்தக் கூட்டத்தில், மாவட்ட காவல் கண்காணிப்பாளா்கள் எஸ்.ராஜேஷ்கண்ணன் (வேலூா்), பாலகிருஷ்ணன் (திருப்பத்தூா்), வேலூா், திருப்பத்தூா் மாவட்ட கூடுதல் காவல் கண்காணிப்பாளா்கள், காவல் துணைக் கண்காணிப்பாளா்கள் பங்கேற்றனா்.