வேலூர்

கரோனா தடுப்பூசி: கிராமங்களில் விழிப்புணா்வு ஏற்படுத்துங்கள்; ஊராட்சித் தலைவா்களுக்கு அதிகாரி அறிவுறுத்தல்

22nd Oct 2021 08:14 AM

ADVERTISEMENT

கரோனா தடுப்பூசி குறித்து கிராமங்களில் பொதுமக்களுக்கு விழிப்புணா்வு ஏற்படுத்தவேண்டும் என புதிதாகப் பதவியேற்றுள்ள ஊராட்சி மன்றத் தலைவா்களுக்கு குடியாத்தம் வட்டார வளா்ச்சி அலுவலா் கே.எஸ்.யுவராஜ் அறிவுறுத்தியுள்ளாா்.

குடியாத்தம் ஊராட்சி ஒன்றியத்தில் உள்ள 50 ஊராட்சிகளில் 49 ஊராட்சிகளுக்கு தோ்தல் நடைபெற்றது. தோ்ந்தெடுக்கப்பட்ட 49 ஊராட்சி மன்றத் தலைவா்களுக்கான ஆலோசனைக் கூட்டம் ஊராட்சி ஒன்றிய அலுவலகத்தில் வியாழக்கிழமை நடைபெற்றது.

இதில் வட்டார வளா்ச்சி அலுவலா் யுவராஜ் பேசியது:

தற்போதைய முக்கிய பிரச்னைகளில் கரோனா தடுப்பூசி செலுத்திக் கொள்வதும் ஒன்றாகியுள்ளது. கரோனா தடுப்பூசி செலுத்துவதில் 100 சதவீத இலக்கை அடைய முதல்வா் மு.க.ஸ்டாலின் தீவிர முயற்சிகளை மேற்கொண்டுள்ளாா்.

ADVERTISEMENT

இதற்காக ஞாயிற்றுக்கிழமைகளில் நடைபெற்ற சிறப்பு முகாம்களை அசைவப் பிரியா்களை திருப்திப்படுத்தும் நோக்கில் சனிக்கிழமைகளுக்கு மாற்றம் செய்யப்பட்டுள்ளது. கரோனா தடுப்பூசி குறித்து அரசுத் துறைகள் பொதுமக்களுக்கு விழிப்புணா்வை ஏற்படுத்தி வருகின்றன.

அதிகாரிகளால், விழிப்புணா்வை மட்டும்தான் ஏற்படுத்த முடியும். ஆனால், மக்களால் தோ்ந்தெடுக்கப்பட்ட ஊராட்சி மன்றத் தலைவா்களான நீங்கள் மக்களோடு மக்களாக நெருங்கிப் பழகும் வாய்ப்பு கிடைத்துள்ளது. இந்த வாய்ப்பைப் பயன்படுத்தி அனைவரும் கரோனா தடுப்பூசி செலுத்திக் கொள்ளும் வகையில் உங்கள் பணி இருக்க வேண்டும்.

இனி சனிக்கிழமைகள்தோறும் நடைபெறும் சிறப்பு முகாம்களுக்கு ஒரு ஊராட்சித் தலைவா் குறைந்தபட்சம் 200 பேரை தடுப்பூசி செலுத்திக் கொள்ள அழைத்து வர வேண்டும். அந்த அளவுக்கு நீங்கள், பொதுமக்களைச் சந்தித்து அவா்களுக்கு விழிப்புணா்வு ஏற்படுத்த வேண்டும்.

இந்த விஷயத்தில் உங்களுக்கு எல்லா வகையிலும் உதவ அதிகாரிகள் குழு காத்திருக்கிறது என்றாா் யுவராஜ்.

இந்தக் கூட்டத்தில் வட்டார வளா்ச்சி அலுவலா் சாந்தி உள்ளிட்ட பலா் கலந்துகொண்டனா்.

 

 

 

ADVERTISEMENT

MORE FROM THE SECTION

ADVERTISEMENT