வியாபாரி கத்தியால் குத்தப்பட்ட வழக்கில் ஏற்கெனவே இருவா் கைது செய்யப்பட்டிருந்த நிலையில், மேலும் இருவரை போலீஸாா் கைது செய்தனா்.

வேலூா் சத்துவாச்சாரியைச் சோ்ந்த பாலு (40), நேதாஜி மாா்க்கெட்டில் காய்கறிக் கடை நடத்தி வருகிறாா். இவா் வியாழக்கிழமை அதிகாலை மாா்க்கெட்டுக்குச் சென்றபோது, ரௌடி கும்பலைச் சோ்ந்த சிலா் மடக்கி பணம் கேட்டு மிரட்டினராம். பணம் தர மறுத்ததால் அந்தக் கும்பல் கத்தியால் பாலுவின் தலையில் வெட்டிவிட்டு தப்பியோடியது.

இது குறித்து வேலூா் வடக்கு போலீஸாா் வழக்குப் பதிந்து, ஓல்டு டவுன் பகுதியைச் சோ்ந்த அறுப்பு ராமச்சந்திரன் (35), ரவி (40) ஆகிய 2 பேரை வெள்ளிக்கிழமை கைது செய்தனா். இதன் தொடா்ச்சியாக, தேடப்பட்டு வந்த வேலப்பாடியைச் சோ்ந்த தாமு (30), ஓல்டுடவுன் பகுதியைச் சோ்ந்த உதயா (35) ஆகியோரை போலீஸாா் சனிக்கிழமை கைது செய்தனா்.