வேலூா்: வேலூா் அருகே 2-ஆவது நாளாக முகமூடி கொள்ளையா்கள் நள்ளிரவில் வீடு புகுந்து நகை கொள்ளையில் ஈடுபட்டனா். அதில், ராணுவ வீரரின் மனைவியிடம் கத்தியைக் காட்டி 5 பவுன் நகை பறித்துச் சென்றனா்.

வேலூா் அருகே உள்ள அப்துல்லாபுரம் சத்தியமங்கலம் கிராமத்தைச் சோ்ந்த ராணுவ வீரரான ஞானசுந்தரம், வடமாநிலத்தில் பணியாற்றி வருகிறாா். இவரது மனைவி சரஸ்வதி (31) தனது தந்தையுடன் சத்தியமங்கலம் கிராமத்தில் வசித்து வருகின்றாா்.

புதன்கிழமை இரவு கதவை திறந்து வைத்து தூங்கியதாகத் தெரிகிறது. நள்ளிரவு 2 மணியளவில் முகமூடி அணிந்த 3 போ் வீடு புகுந்து கத்தியைக் காட்டி மிரட்டி சரஸ்வதி அணிந்திருந்த 5 பவுன் தங்க நகையை பறித்துச் சென்றனா். இதுதொடா்பாக விரிஞ்சிபுரம் போலீஸாா் வழக்குப் பதிவு செய்து, விசாரித்து வருகின்றனா்.

இதேபோல், அரியூா் செம்பேடு கிராமத்தைச் சோ்ந்தவா் வெங்கடேசன் மனைவி பானு (40), ராஜீவ் காந்தி மனைவி ஜெயந்தி (25) ஆகியோரது வீடுகளிலும் செவ்வாய்க்கிழமை இரவு புகுந்த 3 போ் கொண்ட முகமூடி கொள்ளையா்கள், பானு வீட்டில் இருந்து 4 பவுன் நகையையும், ஜெயந்தி வீட்டில் இருந்து 3 பவுன் நகையையும் கொள்ளையடித்துச் சென்றனா்.

இதுதொடா்பாக அரியூா் போலீஸாா் வழக்குப் பதிவு செய்து விசாரணை நடத்தி வருகின்றனா்.

செம்பேடு கிராமத்தைத் தொடா்ந்து சத்தியமங்கலம் கிராமத்தில் முகமூடி கொள்ளையா்கள் நகை கொள்ளையில் ஈடுபட்டிருப்பது வேலூா் மாவட்ட கிராமப்புற மக்களிடையே அச்சத்தை ஏற்படுத்தியுள்ளது.