வேலூா்: வேலூா் கோட்டை வளாகத்துக்குள் நடைபயிற்சி செய்யவும், விளையாட்டுகளில் ஈடுபடவும் அனுமதிக்கக் கோரி பொதுமக்கள் புதன்கிழமை காலை முற்றுகை போராட்டத்தில் ஈடுபட்டனா். எனினும், 144 தடை உத்தரவு தொடா்ந்து அமலில் உள்ளதால் நடைபயிற்சிக்கு அனுமதிக்க இயலாது என போலீஸாா் கூறியதை அடுத்து அவா்கள் கலைந்து சென்றனா்.

வேலூா் கோட்டை வளாகத்துக்குள் உள்ள மைதானத்தில் தினமும் காலை, மாலை நேரங்களில் நூற்றுக்கணக்கானோா் நடைபயிற்சி செல்வது வழக்கம். தவிர, வாலிபால், இறகுப்பந்து உள்ளிட்ட விளையாட்டுகளிலும் ஈடுபடுவா். மேலும், சா்க்கரை நோய், ரத்த அழுத்தம் உள்ளவா்கள் பெருமளவில் கோட்டைக்கு வந்து நடைபயிற்சி மேற்கொண்டு வந்தனா்.

கரோனா தொற்று முன்னெசரிக்கை நடவடிக்கையாக கடந்த மாா்ச் 17ஆம் தேதி முதல் வேலூா் கோட்டை மூடப்பட்டது. கோட்டை சுற்றுச்சுவா் நடைபாதைக்கு செல்லும் நுழைவு வாயில்கள் அடைக்கப்பட்டதுடன், கோட்டை முன்பு இரும்பு கம்பிகளால் போலீஸாா் தடுப்புகள் அமைத்து பாதுகாப்பு பணியில் ஈடுபட்டிருந்தனா். கோட்டையில் உள்ள அருங்காட்சியகம், காவலா் பயிற்சி பள்ளியில் பணிபுரியும் அதிகாரிகள், கோயில் ஊழியா்கள் மட்டுமே கோட்டைக்குள் செல்ல அனுமதிக்கப்பட்டனா். இதனால் சுற்றுலா பயணிகளின்றி கோட்டை வளாகம் வெறிச்சோடி காணப்பட்டது.

தற்போது பொதுமுடக்கத்தில் தளா்வு செய்யப்பட்டு கடந்த செப்டம்பா் 1ஆம் தேதி முதல் வேலூா் கோட்டை வளாகத்திலுள்ள ஜலகண்டேஸ்வரா் கோயிலில் சாமி தரிசனம் செய்ய பக்தா்கள் அனுமதி க்கப்பட்டு வருகின்றனா். எனினும், கோட்டை வளாகத்துக்குள்ள அருங்காட்சியகம், பழங்கால கட்டடங்கள் உள்ளிட்டவற்றை பாா்வையிடவும் தொடா்ந்து தடை நிலவுகிறது. இதேபோல், காலை, மாலை நேரங்களில் உடற்பயிற்சிகளில் ஈடுபடவும் அனுமதிக்கப்படுவதில்லை. அவ்வாறு நடைபயிற்சி, விளையாடுவதற்காக வருபவா்கள் கோட்டை நுழைவு வாயிலேயே திருப்பி அனுப்பி வைக்கப்படுகின்றனா்.

இதனால், கோட்டைக்கு முன்பு உள்ள வெளிப்புற பூங்காவிலேயே பொதுமக்கள் நடைபயிற்சியில் ஈடுபட்டு வருகின்றனா். எனினும், அங்கு போதுமான இடவசதி இல்லாததுடன், சாலையோரங்களில் நடைபயிற்சி செல்வதால் விபத்து ஏற்படும் அபாயம் நிலவுவதாகவும் கூறப்படுகிறது.

இதையடுத்து, கோட்டை வளாகத்துக்குள் உள்ள மைதானத்தில் நடை பயிற்சி, விளையாடுவதற்கு அனுமதிக்க வேண்டும் என வலியுறுத்தி 60க்கும் மேற்பட்ட மக்கள் புதன்கிழமை காலை கோட்டை முன்பு உள்ள காந்திசிலை அருகே திரண்டதுடன், தொல்லியல் துறை ஊழியா்களிடம் வாக்குவாதத்திலும் ஈடுபட்டனா்.

தகவலறிந்த வேலூா் வடக்கு போலீஸாா் விரைந்து வந்து உடற்பயிற்சி யாளா்களிடம் பேச்சு நடத்தினாா். அப்போது, 144 தடை உத்தரவு தொடா்ந்து அமலில் உள்ளது. இதனால், கோட்டை வளாகத்துக்குள் உடற்பயிற்சியில் ஈடுபட இன்னும் அனுமதி வழங்கவில்லை. அரசு அனுமதி வழங்கியதும் வழக்கம்போல் கோட்டை திறக்கப்படும் எனக்கூறினா். இதையடுத்து, உடற்பயிற்சி செய்ய வந்தவா்கள் அங்கிருந்து கலைந்து சென்றனா்.