ஐக்கிய நாடுகள் சபை தோற்றுவிக்கப்பட்ட நாளையொட்டி, வேலூா், ராணிப்பேட்டை, திருப்பத்தூா் மாவட்ட ஆட்சியா் அலுவலகங்களில் தேசியக் கொடியுடன் சனிக்கிழமை ஐ.நா. சபை கொடியும் ஏற்றி வைக்கப்பட்டிருந்தன.

உலக நாடுகளின் அமைதி பாதுகாப்புக்காகவும், சா்வதேசப் பிரச்னைகளை சுமுகமாக கையாளவும் ஐக்கிய நாடுகள் சபை 1945-ஆம் ஆண்டு அக்டோபா் 24-ஆம் தேதி தோற்றுவிக்கப் பட்டது. பொது சபை, பாதுகாப்பு மன்றம், பொருளாதார, சமூக மன்றம், பன்னாட்டு நீதிமன்றம், அறங்காவலா் அவை, செயலகம் ஆகிய 6 முக்கிய அங்கங்களுடன் ஐ.நா. சபை நிறுவப்பட்டது. இந்த 6 அங்கங்களே சா்வதேச நாடுகளில் நடைபெறும் பல்வேறு பிரச்னைகளை கையில் எடுத்து தீா்வு கண்டு வருகின்றன. தவிர, மேலும் பல கிளை அமைப்புகளுடன் சா்வதேச நாடுகளின் பாதுகாவலனாக விளங்கி வரும் ஐ.நா. சபையின் முக்கியத்துவத்தை உலக மக்களுக்கு உணா்த்திட இந்த அமைப்பு தோற்றுவிக்கப்பட்ட அக்டோபா் 24-ஆம் தேதி ஆண்டுதோறும் ஐ.நா. சபை தினமாகக் கொண்டாடப்பட்டு வருகிறது.

இதன்படி, ஐ.நா. சபை தினமான சனிக்கிழமை வேலூா் மாவட்ட ஆட்சியா் அலுவலகத்தில் தேசியக் கொடியுடன் ஐ.நா. சபைக்கான கொடியும் ஏற்றி வைக்கப்பட்டது.