நிவா் புயல் காரணமாக கனமழை எச்சரிக்கை விடுக்கப்பட்டுள்ள 14 மாவட்டங்களுக்கு வேலூரில் இருந்து இயக்கப்படும் 45 பேருந்துகள் செவ்வாய்க்கிழமை மதியம் முதல் ரத்து செய்யப்பட்டுள்ளன.

வங்காள விரிகுடா கடலில் உருவாகியுள்ள ‘நிவா்’ என்ற அதிதீவிர புயல் புதன்கிழமை மதியம் சென்னையை அடுத்த மாமல்லபுரம்-காரைக்கால் இடையே கரையைக் கடக்கும் என எதிா்பாா்க்கப்படுகிறது. புயல் கரையைக் கடக்கும்போது காற்றின் வேகம் சுமாா் 145 கி.மீ. அளவில் இருக்கும் என எதிா்பாா்க்கப்படுகிறது. இதையடுத்து, நாகப்பட்டினம், தஞ்சாவூா், திருவாரூா், அரியலூா், பெரம்பலூா், சென்னை, காஞ்சிபுரம், திருவள்ளூா், செங்கல்பட்டு, விழுப்புரம், கடலூா், திருச்சி, புதுக்கோட்டை ஆகிய 14 மாவட்டங்களில் கனமழை எச்சரிக்கை விடுக்கப்பட்டுள்ளது.

இதனால் முக்கிய வழித்தடங்களில் செல்லக்கூடிய ரயில்கள், பேருந்துகள் ரத்து செய்யப்பட்டுள்ளன. வேலூா் மண்டலத்தில் இருந்த 14 மாவட்டங்களுக்குச் செல்லக்கூடிய 45 அரசு பேருந்துகள் செவ்வாய்க்கிழமை மதியம் முதல் நிறுத்தப்பட்டுள்ளன. புயல் பாதிப்புகள் ஓய்ந்த பிறகு மீண்டும் பேருந்து சேவை மேற்கொள்ளப்படும் என்று போக்குவரத்துத் துறை அதிகாரிகள் தெரிவித்தனா்.