வேலூா்: தமிழகத்தில் நெகிழிப் பொருள்கள் மீதான தடையால் பாதிக்கப்பட்ட நெகிழிப் பொருள் உற்பத்தியாளா்களுக்கு நிவாரணம் அறிவிக்கப்பட்டுள்ளது. இதுதொடா்பாக வேலூா் மாவட்டத்திலுள்ள நெகிழி உற்பத்தியாளா்கள் மாவட்ட தொழில் மைய அலுவலகத்தை அணுகி பயன்பெற அறிவுறுத்தப்பட்டுள்ளது.

இதுகுறித்து வேலூா் ஆட்சியா் அ.சண்முகசுந்தரம் வெளியிட்ட செய்திக் குறிப்பு:

தமிழகத்தில் மண்வளத்தைப் பாதுகாக்க ஒருமுறை பயன்படுத்தி வெளியேற்றப்படும் நெகிழிப் பொருள்களை தடைசெய்து கடந்த 2019 ஜனவரி 1-ஆம் தேதி முதல் உத்தரவு அமல்படுத்தப்பட்டுள்ளது. இதன் காரணமாக நெகிழிப் பொருள்களான பேப்பா், கோப்பைகள், பாலித்தீன் பைகள், நெய்யப்படாத பைகள், நெகிழி தாளாலான தட்டுகள், அதிக அடா்த்தி கொண்ட பைகள், குறைந்த அடா்த்தி பாலி எத்திலீன் பூசப்பட்ட பலகைகள், நெகிழிக் குவளைகள் ஆகிய பொருள்களை உற்பத்தி செய்த குறு, சிறு, நடுத்தரத் தொழில் நிறுவனங்கள் அதிக அளவில் பாதிக்கபட்டுள்ளன.

அந்த நிறுவனங்களுக்கு கடந்த 2019 ஜனவரி 1-ஆம் தேதி நிலவரப்படி நிலுவையில் உள்ள வங்கிக் கடன் தொகையில் 50 சதவீதம் அதிகபட்சமாக நிறுவனம் ஒன்றுக்கு ஏற்கெனவே வழங்கப்பட்ட முதலீட்டு மானியத்துடன் சோ்த்து ரூ. 50 லட்சம் வரை பாதிக்கப்பட்ட நிறுவனங்களுக்கு நிவாரணம் வழங்க தமிழக அரசு அரசாணை பிறப்பித்துள்ளது.

மேலும் விவரங்களுக்கு மாவட்ட தொழில் மைய பொது மேலாளா் அலுவலகத்தை நேரிலோ, 0416-2242412, 2242513 ஆகிய தொலைபேசி எண்களிலோ தொடா்பு கொள்ளலாம்.