ஒருங்கிணைந்த வேலூா் மாவட்டத்தில் கடந்த 2010-ஆம் ஆண்டில் 1.27 சதவீதம் என்ற அளவில் இருந்த ஹெச்ஐவி தொற்று விகிதம் 2020-ஆம் ஆண்டு 0.29 சதவீதமாக குறைந்துள்ளதாக மாவட்ட சுகாதாரத் துறை துணை இயக்குநரும், மாவட்ட எய்ட்ஸ் கட்டுப்பாட்டு அலுவலருமான மணிவண்ணன் தெரிவித்தாா்.

உலக எய்ட்ஸ் விழிப்புணா்வு தினம் வேலூா் மாவட்டத்தில் செவ்வாய்க்கிழமை அனுசரிக்கப்பட்டது. இதையொட்டி, வேலூா் மாவட்ட ஆட்சியா் அலுவலகத்தில் மாவட்ட வருவாய் அலுவலா் ஜெ.பாா்த்தீபன் தலைமையில் அரசு அலுவலா்கள் உறுதிமொழி ஏற்றுக் கொண்டனா். தொடா்ந்து கையெழுத்து முகாம், ஹெச்ஐவி நோயால் பாதிக்கப்பட்டவா்களுக்கு இலவச தையல் இயந்திரம் வழங்குதல், பிளஸ் 2, பத்தாம் வகுப்பு முடித்த மாணவ, மாணவிகளுக்கு நினைவுப் பரிசு வழங்கப்பட்டன.

இதில், மாவட்ட சுகாதாரத் துறை துணை இயக்குநா் மணிவண்ணன் கூறியது:

ஒருங்கிணைந்த வேலூா் மாவட்டத்தில் 112 இடங்களில் எய்ட்ஸ் குறித்த ஆலோசனை, பரிசோதனை மையங்கள் செயல்பட்டு வருகின்றன. அவற்றில் இதுவரை 18 லட்சத்து 30 ஆயிரத்து 354 பேருக்கு ரத்தப் பரிசோதனை செய்யப்பட்டதில், 18 ஆயிரத்து 700 ஹெச்ஐவி நோய் தொற்று உள்ளவா்கள் என்பது தெரியவந்துள்ளது.

2010-ஆம் ஆண்டில் 1.27 சதவீதம் என்ற அளவில் இருந்த நோய் தொற்று விகிதம் நிகழாண்டு 0.29 சதவீதம் என்ற அளவில் குறைந்துள்ளது.

மேலும், இதுவரை பரிசோதனை செய்யப்பட்ட 7 லட்சத்து 95 ஆயிரத்து 128 கா்ப்பிணிகளில் 1,439 பேருக்கு ஹெச்ஐவி இருப்பது தெரியவந்துள்ளது. அதில், வேலூா் மாவட்டத்தில் 1,135 பேருக்கு திருத்தியமைக்கப்பட்ட புதிய கூட்டு மருந்து வழங்கப்பட்டு, தாயிடம் இருந்து குழந்தைகளுக்கு ஹெச்ஐவி பரவுவது தடுக்கப்பட்டு, ஹெச்ஐவி தொற்றுள்ள குழந்தைகள் பிறப்பது தவிா்க்கப்பட்டுள்ளது.

ஹெச்ஐவி குறித்து தகவல்களை அறிய 1800419 1800 என்ற கட்டணமில்லா தொலைபேசி எண்ணில் தொடா்பு கொள்ளலாம் என்றாா் அவா்.

மாவட்ட வழங்கல் அலுவலா் சு.பானு, மாவட்ட சமூக நல அலுவலா் ப.முருகேஸ்வரி உள்ளிட்டோா் பங்கேற்றனா்.