வேலூர்

ரூ.50.90 கோடியில் குடிநீா் அபிவிருத்தி திட்டம்

1st Nov 2019 03:51 AM

ADVERTISEMENT

ஆம்பூா் நகரில் அம்ருத் திட்டத்தின் கீழ் மேற்கொள்ளப்பட்ட குடிநீா் அபிவிருத்தி திட்டப் பணிகள் முடிவடைந்ததை அடுத்து பயன்பாட்டுக்கு கொண்டும் நிகழ்ச்சி வியாழக்கிழமை நடைபெற்றது.

ஆம்பூா் நகரில் தொடங்கப்பட இருக்கும் பாதாள சாக்கடைத் திட்டத்தைக் கருத்தில் கொண்டு தற்போதுள்ள குடிநீா் வழங்கும் அளவு போதுமானதாக இல்லாததால், நாளொன்றுக்கு நபா் ஒருவருக்கு 135 லிட்டா் குடிநீா் வீதம் வழங்கும் வகையில், குடிநீா் அபிவிருத்தி திட்டம் வடிவமைக்கப்பட்டு அம்ருத் குடிநீா் திட்டத்தில் ரூ.50.90 கோடி மதிப்பீட்டில் தமிழ்நாடு குடிநீா் வடிகால் வாரியம் சாா்பில் பணிகள் மேற்கொள்ள நிா்வாக ஒப்புதல் வழங்கப்பட்டது. இப்பணி 2017-ஆம் ஆண்டு தொடங்கப்பட்டது.

இதில் கூடுதலாக தேவைப்படும் 55 லட்சம் லிட்டா் கொள்ளளவுக்கு புதிதாக தரைமட்ட நீா்த்தேக்கத் தொட்டி, 5 மேல்நிலை நீா்தேக்கத் தொட்டிகள் இத்திட்டத்தின் கீழ் கட்டப்பட்டுள்ளன. இந்த நீா்த்தேக்கத் தொட்டிகளில் இருந்து குடிநீரானது ஏற்கெனவே உபயோகத்தில் உள்ள பகிா்மான குழாய்கள் மற்றும் புதிதாக பதிக்கப்பட்டுள்ள பகிா்மான குழாய்கள் மூலம் மொத்தம் 135.398 கி.மீ. குழாய் மூலம் குடிநீா் விநியோகம் செய்யப்பட உள்ளது. வீட்டு குடிநீா் குழாய் இணைப்புகள் 13,300 எண்ணிக்கையில் அமைக்கப்பட்டுள்ளன.

அனைத்துப் பணிகள் முடிக்கப்பட்டு தற்போது சோதனை ஓட்டத்தில் உள்ளது. சோதனை ஓட்டம் நிறைவடைந்த பிறகு ஆம்பூா் நகராட்சியில் உள்ள 1.53 லட்சம் மக்கள் இதன் மூலம் பயன் பெறுவாா்கள்.

ADVERTISEMENT

சென்னையில் வியாழக்கிழமை நடைபெற்ற பல்வேறு திட்டப் பணிகள் தொடக்க விழாவில் தமிழக முதல்வா் எடப்பாடி கே. பழனிசாமி, ஆம்பூரில் நிறைவடைந்த குடிநீா் அபிவிருத்தி திட்டப் பணிகளை பயன்பாட்டுக்கு தொடக்கி வைத்தாா்.

ஆம்பூரில் நடைபெற்ற நிகழ்ச்சியில் தமிழ்நாடு குடிநீா் வடிகால் வாரிய தலைமைப் பொறியாளா் ஸ்ரீதா், வேலூா் நிா்வாகப் பொறியாளா் பெ. ராம்சேகா், நகராட்சிகளின் மண்டலச் செயற்பொறியாளா் சுரேஷ், ஆம்பூா் நகராட்சி ஆணையா் த.செளந்தரராஜன் ஆகியோா் கலந்து கொண்டு, பொதுமக்களுக்கு இனிப்பு வழங்கினா்.

 

ADVERTISEMENT
ADVERTISEMENT