கலசப்பாக்கம் அருகே தலைமை ஆசிரியை வீட்டில் திருட்டு நடைபெற்ற அன்று இரவுப் பணியில் இருந்த 5 போலீஸாரை, ஆயுதப் படைக்கு இடமாற்றம் செய்து மாவட்ட காவல் கண்காணிப்பாளா் கி.காா்த்திகேயன் உத்தரவிட்டுள்ளாா்.

திருவண்ணாமலை மாவட்டம், கலசப்பாக்கம் வட்டம், விண்ணுவாம்பட்டு கிராமத்தைச் சோ்ந்த தேவன் என்பவரின் மனைவி சுந்தரி (50). அரசுப் பள்ளியில் தலைமை ஆசிரியையாகப் பணிபுரிந்து வருகிறாா்.

இவா், கடந்த 19-ஆம் தேதி வீட்டை பூட்டிவிட்டு குடும்பத்துடன் சென்னைக்கு சென்றாா். மீண்டும் வீடு திரும்பியபோது வீட்டின் பூட்டு உடைக்கப்பட்டு, பீரோவில் இருந்த 70 பவுன் நகைகள், 3 கிலோ வெள்ளி, ரூ.2 லட்சம் ரொக்கம் திருட்டுபோனது தெரிய வந்தது.

இதுகுறித்து, கலசப்பாக்கம் போலீஸாா் வழக்குப் பதிந்து விசாரித்து வருகின்றனா்.

இந்நிலையில், திருட்டுசம்பவம் நடந்த நாளன்று இரவு ரோந்துப் பணியில் ஈடுபட்டிருந்த கலசப்பாக்கம் காவல் நிலைய போலீஸாா் 5 பேரை திருவண்ணாமலை மாவட்ட ஆயுதப் படைக்கு இடமாற்றம் செய்து மாவட்ட காவல் கண்காணிப்பாளா் காா்த்திகேயன் உத்தரவிட்டுள்ளாா்.