திருவண்ணாமலை மாவட்டம், செங்கம் அருகே குரங்குகள் தொல்லையால் வாகன ஓட்டிகள் அவதிக்குள்ளாகி வருகின்றனா்.

செங்கம் - திருவண்ணாமலை சாலை மேல்செங்கம் மத்திய மாநில விதைப்பண்ணை பகுதியில் குரங்குகள் அதிகளவில் வசித்து வருகின்றன.

கடந்த 2021-ஆம் ஆண்டு கரோனா தொற்றின்போது சாலையில் செல்லும் வாகன ஓட்டிகள் வாகனத்தில் இருந்த அழுகிய பழம், விற்பனை ஆகாத பழங்கள், விவசாய நிலத்தில் விளைந்த காய், கனிகளை குரங்குகளுக்கு அளித்து வந்தனா்.

மேலும், இரு சக்கர வாகனம், காா்களில் செல்வோரும் தின்பண்டங்களை குரங்குகளுக்கு போடும் பழக்கத்தை ஏற்படுத்தினா்.

அதனால், குரங்குகள் இனப்பெருக்கம் அதிகரித்து மேல்செங்கம் முதல் தண்டம்பட்டு வரை சாலையோரம் குரங்குகள் அதிகளவில் வசித்து வருகின்றன.

இவைகள் காா், லாரி போன்ற வாகனங்கள் வரும்போது வாகனத்தை பின்தொடா்ந்து ஓடுகின்றன. அதனால், வாகனத்தில் செல்வோா் தின்பண்டங்களை சாலையில் போடுகிறாா்கள். அவற்றை சாப்பிட குரங்குகள்

ஒன்றோடு ஒன்று அடித்துக்கொள்கின்றன.

அப்போது, அந்த வழியாக வரும் வாகன ஓட்டிகள் சாலை நடுவில் குரங்குக் கூட்டத்தைப் பாா்த்து வாகனத்தை குரங்கு மேல் ஏற்றிவிடுவோமோ என்ற அச்சத்தில்

தடுமாற்றத்துடன் ஓட்ட வேண்டிய நிலை ஏற்படுகிறது.

சில நேரங்களில் குரங்குக் கூட்டத்தால் விபத்துகள் நேரிடுகின்றன. மேலும், சுப நிகழ்ச்சிகளுக்கு செல்லும் காா்கள் குரங்கு மீது மோதி பல்வேறு சங்கடங்கள் அவா்கள் குடும்பத்தில் ஏற்படுகிறது.

அதேபோல, செங்கத்தில் இருந்து நீப்பத்துறை செல்லும் சாலையிலும் குரங்குகளின் அட்டகாசம் அதிகரித்துள்ளது.

இதுகுறித்து வனத்துறை அதிகாரிகள் நடவடிக்கை எடுத்து சாலையில் சுற்றித்திரியும் குரங்குகளைப் பிடித்து வனத்துக்குள் அனுப்ப வேண்டும் என பொதுமக்களும், வாகன ஓட்டிகளும் எதிா்பாா்க்கிறாா்கள்.