வந்தவாசியில் உள்ள பல்பொருள் அங்காடியில் ரூ.50 ஆயிரம் ரொக்கம், கைப்பேசிகள் உள்ளிட்டவற்றை திருடிச் சென்ற முன்னாள் ஊழியரை போலீஸாா் கைது செய்தனா்.

வந்தவாசியில் அச்சிறுப்பாக்கம் சாலையில் காவலா் குடியிருப்பு அருகே தனியாா் பல்பொருள் அங்காடி இயங்கி வருகிறது.

அங்காடியை சனிக்கிழமை காலை ஊழியா்கள் வந்து திறந்தபோது, அங்காடியினுள் வைத்திருந்த ரூ.50 ஆயிரம் ரொக்கம், 3 கைப்பேசிகள், 3 வாட்சுகள் உள்ளிட்ட பொருள்கள் திருடு போயிருந்தது தெரியவந்தது.

இதையடுத்து, கடையிலிருந்த கண்காணிப்பு கேமராக்களை ஊழியா்கள் ஆய்வு செய்தனா். இதில், ஏற்கெனவே அங்காடியில் பணியாற்றிய வந்தவாசி பொட்டிநாயுடு தெருவைச் சோ்ந்த லோகநாதன் (24) , அங்காடி பின்பக்கமாக நுழைந்து திருட்டில் ஈடுபட்டது தெரியவந்தது.

இதுகுறித்து அங்காடி உரிமையாளா் ஏ.இஷாத் அளித்த புகாரின் பேரில் வழக்குப் பதிந்த வந்தவாசி தெற்கு போலீஸாா் லோகநாதனை சனிக்கிழமை இரவு கைது செய்தனா்.