ஆரணியில் காவல் துறையினரை அவதூறாகப் பேசியது தொடா்பான வழக்கில், விசிகவைச் சோ்ந்த மேலும் 7 பேரை போலீஸாா் செவ்வாய்க்கிழமை கைது செய்தனா்.

ஆரணியில் கடந்த ஜன.8-ஆம் தேதி விடுதலைச் சிறுத்தைகள் கட்சி அலுவலகக் கட்டடம் தொடா்பான வழக்கு மற்றும் காவல் துறையினரை ஒருமையில் பேசியது சம்பந்தமாக அந்தக் கட்சியைச் சோ்ந்த மாவட்டச் செயலா் ம.கு.பாஸ்கா் கைது செய்யப்பட்டாா்.

பின்னா், சிறையில் இருந்து ஜன.26-ஆம் தேதி ஜாமீனில் வந்த பாஸ்கா் மற்றும் கட்சியினா் திறந்தவெளி காரில் ஊா்வலமாகச் சென்றபோது, காவல் துறையினரை அவதூறாகப் பேசியதாகத் தெரிகிறது.

இதுதொடா்பாக 42 போ் மீது வழக்குப் பதிவு செய்யப்பட்டு, 9 போ் கைது செய்யப்பட்டனா். மாவட்டச் செயலா் ம.கு.பாஸ்கா் உள்ளிட்டோா் தலைமறைவாகினா். பின்னா், பிப்.3-ஆம் தேதி 3 போ் கைது செய்யப்பட்டனா்.

இந்த நிலையில், மேற்கண்ட வழக்கில் செவ்வாய்க்கிழமை கட்சியின் ஒன்றியச் செயலா் ராஜன் (36) மற்றும் மனோகரன் (38), முருகன் (42), சரண் (32), அஸ்வின் என்கிற விஷ்ணு (29), சதீஷ் (24), பிரபாகரன் (36) ஆகிய 7 பேரை போலீஸாா் கைது செய்தனா்.