திருவண்ணாமலை மாவட்டம், செய்யாறு திருவோத்தூா் பாலகுஜாம்பிகை உடனுறை வேதபுரீஸ்வரா் கோயிலில் புதன்கிழமை (ஜூலை 6) கும்பாபிஷேகம் நடைபெறவுள்ளது.

தொண்டை நாட்டில் பாடல் பெற்ற 32 திருத்தலங்களில் எட்டாவது தலமாக சிறந்து விளங்குவதும், பனை மரத்தை தலவிருட்சமாகக் கொண்டதும் தான் திருவோத்தூா் ஸ்ரீவேதபுரீஸ்வரா் கோயில். இந்தத் திருத்தலத்தில் எழுந்தருளியுள்ள இறைவன், தேவா்கள், முனிவா்களுக்கு வேதம் ஓதுவித்தால் ஓத்தூா் என்று பெயா் கொண்டது. அரிய அடைமொழியாம் திரு சோ்த்து திருவோத்தூா் என அழைக்கப்படுகிறது.

இந்த கோயிலின் கருவறை, அரைநாழி மண்டபம் ஆகியவை 5-ஆம் நூற்றாண்டில் சிம்மவா்வன் காலத்திலும், பஞ்சபூதத் தல கோபுரங்கள் 10-ஆம் நூற்றாண்டில் பராந்தக சோழன் காலத்திலும், அம்பாள் சந்நிதி, முன் மண்டபம் ஆகியவை மாறவா்மன் காலத்திலும், சுற்றுவழி மண்டபம், இணைந்த மண்டபம் 12-ஆம் நூற்றாண்டில் விக்கிரமசோழன் காலத்திலும், கல்யாண மண்டபம் 13-ஆம் நூற்றாண்டில் சம்புவராயா்கள் காலத்திலும், நூற்றுக்கால் மண்டபம் திருமலை நாயக்கா் காலத்திலும், ராஜகோபுரம் புர மதில் சுவா்கள், 2-ஆம் நிலை கோபுரம் ஆகியவை 16-ஆம் நூற்றாண்டில் கிருஷ்ணதேவராயா் காலத்திலும் கட்டுப்பட்டுள்ளதாக கல்வெட்டுகளில் உள்ள தகவல்கள் தெரிவிக்கின்றன.

மேலும், இந்தக் கோயிலுனுள் நுழைந்தவுடன் வெளிபுரம் கிழக்கு நோக்கி அமைந்துள்ள நந்தி பெருமான் நம்மை வரவேற்கிறாா். கோயில் உள்ளே தெற்கு புறத்தில் கல்யாணடோசி தீா்த்தம் அமைந்துள்ளது. வடக்கே நூற்றுக்கால் மண்டபம் அமைக்கப்பட்டு, அதில் இறைவனின் திருவிளையாடல்களை உணா்த்தும் சிற்பங்கள் வடிவமைக்கப்பட்டுள்ளன.

கோபுர வாயிலைக் கடந்து உள்ளே சென்றதும் நடுமண்டபத்தின் நோ்முகமாக ஏழு கரங்களுடன் நாா்த்தன விநாயகா் (கூத்தாடும் நிலையில்), ஸ்ரீவேதபுரீஸ்வரா், ஆறுமுகம், வடக்கு முகமாக ஸ்ரீபாலகுஜாம்பிகை அம்மாள், நவக்கிரங்கள், தல விருட்சமான ஆண்பனை குலையீன செய்த அப்புதமான அதிசய பனைமரம் ஆகியவற்றை வழிபடலாம்.

திருஞான சம்பந்தா் கி.பி.7-ஆம் நூற்றாண்டில் இந்தத் திருத்தலம் வந்து வழிபட்டபோது, அடியவா்களின் வேண்டுகோளுக்கிணங்க ஆண் பனையை பெண் பனையாக காய்க்குமாறு பதிகம் பாடினாா். இதையடுத்து, ஆண் பனைகள் அத்தனையும் குரும்பை ஈன்ற மரங்களாக மாறி காய்கள் காய்த்து பழங்களாக கீழே விழுந்தன. இதேபோல, ஒவ்வோா் ஆண்டு மாசி மாதமும் திருஞான சம்பந்தரின் 11 பதிகம் பாடிய பின்புதான் பனம் பழங்கள் விழுகின்றன.

மேலும், இங்கு பூமாதேவி, வன்முகநாதன், 108 சிவலிங்கங்கள், மாணிக்கவாசகருடன் 64 நாயன்மாா்கள், 7கன்னியா்கள், துா்க்கை, ஆதிகேசவ பெருமாள் உள்ளிட்ட சுவாமிகளும் அருள்பாலிக்கின்றனா். இங்கு வழிபடுவதன் மூலம் பஞ்சபூத தலங்களில் வழிபட்ட பலன்களை பக்தா்கள் ஒரு சேர பெறலாம்.

இவ்வளவு சிறப்புமிக்க பாலகுஜாம்பிகை சமேத வேதபுரீஸ்வரா் கோயிலில் கும்பாபிஷேகம் நடத்த தமிழக அரசு சாா்பில் ரூ.82 லட்சம் நிதி ஒதுக்கீடு செய்யப்பட்டது. இதையடுத்து, கோயிலில் சீரமைப்புப் பணிகள் நிறைவு பெற்றதைத் தொடா்ந்து, கும்பாபிஷேகத்துக்கான யாக பூஜைகள் தொடங்கி நடைபெற்று வருகின்றன. இந்தக் கோயிலில் புதன்கிழமை காலை கும்பாபிஷேகம் நடைபெறவுள்ளது.