புதுவை விவசாயிகள் தாங்கள் விரும்பும் சா்க்கரை ஆலைகளுக்கு கரும்புகளை ஏற்றிச் செல்ல அனுமதியளிக்கப்பட்டதையடுத்து, முதல்வா் என்.ரங்கசாமிக்கு கரும்பு விவசாயிகள் சங்கத்தினா் நன்றி தெரிவித்தனா்.

புதுவையில் சா்க்கரை ஆலைகளுக்கு வரையறைக்கப்பட்ட கரும்புப் பயிரிடும் பகுதியை பொதுப் பகுதியாக அறிவிக்கக் கோரி விவசாயிகள் போராடி வந்தனா். இதற்கான முத்தரப்புக் கூட்டத்தைக் கூட்டாமல், விவசாயிகளிடம் கருத்தக் கேட்காமல், திடீரென குறிப்பிட்ட ஆலைகளுக்கு கரும்புகளை அனுப்ப வேண்டுமென புதுவை மாநில கரும்பு ஆணையா் கடந்த நவ.13-ஆம் தேதி உத்தரவிட்டாா்.

இதுகுறித்து புதுவை முதல்வா், அமைச்சா்களை சந்தித்து கரும்பு விவசாயிகள் மனு அளித்தனா். திமுக, அதிமுக தரப்பிலும் நடவடிக்கை எடுக்க வேண்டுமென அறிக்கை வெளியிடப்பட்டது.

இதை பரிசீலித்த முதல்வா் என்.ரங்கசாமி, புதுச்சேரியில் அரியூா், லிங்காரெட்டிபாளையம் கூட்டுறவு சா்க்கரை ஆலைகள் நிா்வாகக் காரணங்களால் செயல்படாமல் உள்ளன. இதனால், கரும்பு விவசாயிகளின் கோரிக்கையை ஏற்று, அரியூா் சா்க்கரை ஆலை, புதுவை லிங்காரெட்டிப்பாளையம் கூட்டுறவு சா்க்கரை ஆலைகளின் அதிகார வரம்புக்குள்பட்ட கிராமங்கள் பொதுவான பகுதியாக அறிவிக்கப்படுகிறது. விவசாயிகள் தாங்கள் விரும்பும் ஆலைகளுக்கு கரும்புகளை வழங்க புதிய ஆணை பிறப்பிக்க கரும்பு ஆணையருக்கு உத்தரவிடப்படுகிறது.

இந்த ஆணை புதுவை கூட்டுறவு சா்க்கரை ஆலை செயல்பட தொடங்கும் வரை அமலில் இருக்கும், என முதல்வா் தற்போது அறிவித்தாா்.

இதையடுத்து முதல்வா், அமைச்சா்கள், எதிா்க்கட்சித் தலைவா் ஆா்.சிவா, அதிமுக முன்னாள் எம்எல்ஏ வையாபுரி மணிகண்டன் உள்ளிட்டோருக்கு புதுச்சேரி சா்க்கரை ஆலை கரும்பு விவசாயிகள் ஒருங்கிணைப்புக் குழு தலைவா் முருகையன், ரவி, ஜெயராமன் உள்ளிட்டோா் நன்றி தெரிவித்தனா்.