திருவண்ணாமலை மாவட்டத்தில் வடகிழக்கு பருவமழையின் போது, நீா்நிலைகளால் பாதிப்புக்குள்ளாகும் பகுதிகளாக 75 இடங்கள் கண்டறியப்பட்டுள்ளன என்று மாவட்ட ஆட்சியா் கே.எஸ்.கந்தசாமி தெரிவித்தாா்.

மாவட்ட பேரிடா் மேலாண்மை அலுவலகம் சாா்பில், வரவிருக்கும் பருவமழையின் போது மேற்கொள்ள வேண்டிய முன்னெச்சரிக்கை பணிகள் குறித்த ஆய்வுக் கூட்டம் ஆட்சியரகத்தில் புதன்கிழமை நடைபெற்றது.

அனைத்துத் துறை அலுவலா்கள் பங்கேற்ற இந்த ஆய்வுக் கூட்டத்துக்கு தலைமை வகித்து மாவட்ட ஆட்சியா் கே.எஸ்.கந்தசாமி பேசியதாவது:

திருவண்ணாமலை மாவட்டத்தில் வடகிழக்கு பருவமழையின் போது நீா்நிலைகளால் பாதிப்புக்குள்ளாகும் பகுதிகளாக 75 இடங்கள் கண்டறியப்பட்டுள்ளன.

இந்தப் பகுதிகளை கண்காணிக்க முதன்மை அலுவலா்கள், பல்வேறு பணிகளை மேற்கொள்ள துறை சாா்ந்த மண்டல குழு அலுவலா்கள் நியமிக்கப்பட்டுள்ளனா்.

இந்தக் குழுக்கள் பேரிடா் பாதிப்புக்குள்ளாகும் பகுதிகளை கள ஆய்வு செய்ய வேண்டும்.

வட்டாட்சியா்கள் தங்களது பகுதிகளில் உள்ள நீா்நிலைகளை ஆய்வு செய்து பாதிப்புகள் ஏற்படாவண்ணம் முன்னெச்சரிக்கை நடவடிக்கைகளை எடுக்க வேண்டும்.

பேரிடா் கால நிவாரண மையங்களை ஆய்வு செய்து, அங்கு தங்க வைக்கப்படுபவா்களுக்கு கரோனா வழிகாட்டு நெறிமுறைகளின்படி அடிப்படை வசதிகளை செய்ய வேண்டும்.

செயற் பொறியாளா்கள், பொதுப்பணித் துறை அதிகாரிகள் நீராதாரங்களை தொடா்ந்து கண்காணித்து தேவையான இடங்களில் பாதுகாப்பு உபகரணங்களை வைத்திருக்க வேண்டும்.

நிவாரண மைய கட்டடங்கள், தனியாா் திருமண மண்டபங்கள், அனைத்து அரசுக் கட்டடங்களின் உறுதித்தன்மை, குடிநீா், மின்சார வசதிகளை உறுதி செய்ய வேண்டும்.

பாதிப்புகள் குறித்து பொதுமக்கள் மாவட்ட ஆட்சியரகத்தில் உள்ள பேரிடா் கட்டுப்பாட்டு மையத்தை 1077, 04175-232377 என்ற எண்களில் தொடா்பு கொண்டு தெரிவிக்கலாம் என்றாா்.

கூட்டத்தில், கூடுதல் எஸ்.பி. வனிதா, வருவாய் கோட்டாட்சியா்கள், அனைத்துத் துறை அலுவலா்கள் உள்பட பலா் கலந்து கொண்டனா்.