திருவண்ணாமலை

சாத்தனூா் அணையில் இருந்து தண்ணீா் திறப்பு

6th Feb 2020 02:17 AM

ADVERTISEMENT

சாத்தனூா் அணையில் இருந்து திருவண்ணாமலை, விழுப்புரம், கள்ளக்குறிச்சி மாவட்டங்களைச் சோ்ந்த 12,543 ஏக்கா் விவசாய நிலங்கள் பாசன வசதி பெறும் வகையில் புதன்கிழமை தண்ணீா் திறந்து விடப்பட்டது.

திருவண்ணாமலை மாவட்டம், தண்டராம்பட்டு வட்டத்தில் அமைந்துள்ள சாத்தனூா் அணையில் இருந்து பாசனத்துக்கு தண்ணீா் திறந்து விட முதல்வா் எடப்பாடி கே.பழனிசாமி சில தினங்களுக்கு முன்பு உத்தரவிட்டாா்.

இதையடுத்து, புதன்கிழமை (பிப்.5) அணையில் இருந்து தண்ணீா் திறக்கும் நிகழ்ச்சி நடைபெற்றது. மாவட்ட ஆட்சியா் கே.எஸ்.கந்தசாமி தலைமை வகித்தாா். மாவட்ட வருவாய் அலுவலா் பொ.ரத்தினசாமி, மாவட்ட பால் உற்பத்தியாளா்கள் கூட்டுறவு ஒன்றியத் தலைவா் அக்ரி எஸ்.எஸ்.கிருஷ்ணமூா்த்தி, பொதுப்பணித் துறை செயற்பொறியாளா் (நீா்வளம்) ஏ.மகேந்திரன் ஆகியோா் முன்னிலை வகித்தனா். இந்து சமய அறநிலையத் துறை அமைச்சா் சேவூா் எஸ்.ராமச்சந்திரன் அணையிலிருந்து தண்ணீரை வலது, இடது புற கால்வாய்களில் திறந்து விட்டாா்.

பின்னா், அவா் செய்தியாளா்களிடம் கூறியதாவது: விவசாயிகளின் கோரிக்கையை ஏற்று 7,543 ஏக்கா் விளைநிலங்கள் பாசன வசதி பெறும் வகையில் தண்ணீா் திறக்கப்பட்டுள்ளது.

ADVERTISEMENT

அணையின் இடது புற கால்வாய் வழியாக விநாடிக்கு 302.40 மில்லியன் கன அடியும், வலது புற கால்வாய் வழியாக 453.60 மில்லியன் கன அடியும் என மொத்தம் 756 மில்லியன் கன அடி தண்ணீா் திறக்கப்பட்டுள்ளது. வருகிற மாா்ச் 10-ஆம் தேதி வரை தொடா்ந்து 35 நாள்களுக்கு தண்ணீா் திறந்து விடப்படும்.

இதுதவிர, திருக்கோவிலூா் அணைக்கட்டு பெண்ணையாறு பாசன பழைய ஆயக்கட்டு பகுதிகளைச் சோ்ந்த 5 ஆயிரம் ஏக்கா் விவசாய நிலங்கள் பாசன வசதி பெறும் வகையில் 1,200 மில்லியன் கன அடி தண்ணீா் ஏப்ரல் மாதத்துக்குள் விவசாயிகளின் கோரிக்கை அடிப்படையில் தேவைப்படும்போது திறந்துவிடப்படும்.

இதன் மூலம் திருவண்ணாமலை, விழுப்புரம், கள்ளக்குறிச்சி மாவட்டங்களைச் சோ்ந்த 12 ஆயிரத்து 543 ஏக்கா் விவசாய நிலங்கள் பாசன வசதி பெறும்.

சாத்தனூா் அணை சீரமைப்புக்கான மதிப்பீடு தயாரிக்கப்பட்டு, மத்திய நீா்வள ஆணையம் மூலம் உலக வங்கிக்கு சமா்ப்பிக்கப்படவுள்ளது. உலக வங்கி நிதி வழங்கியதும் அணை சீரமைப்புப் பணிகள் தொடங்கப்படும் என்றாா்.

நிகழ்ச்சியில், சாத்தனூா் அணையின் உதவி செயற்பொறியாளா் இ.அறிவழகன், முன்னாள் அமைச்சா் எஸ்.ராமச்சந்திரன், முன்னாள் எம்எல்ஏ ஏ.கே.அரங்கநாதன் உள்ளிட்டோா் கலந்து கொண்டனா்.

ADVERTISEMENT
ADVERTISEMENT