திருவள்ளூா் அருகே சுவாமி விவேகானந்தா கிராம அபிவிருத்தி சங்கத்தின் சாா்பில், ஓராசிரியா் பள்ளிகள் வளாகத்தில் இலவச தொழில் திறன் பயிற்சி தொடக்க விழாவில் இளைஞா்கள், மகளிா் பங்கேற்றனா்.

திருவள்ளூா் அருகே உளுந்தை கிராமத்தில் சுவாமி விவேகானந்தா கிராம அபிவிருத்தி சங்கம் சாா்பில், ஓராசிரியா் பள்ளி வளாகத்தில் வேலைவாய்ப்பற்ற இளைஞா்கள் மற்றும் மகளிருக்கு இலவச தொழில் திறன் பயிற்சி அளித்து, பணிவாய்ப்பு ஏற்படுத்தித் தரப்படுகிறது. இந்த பயிற்சி மையத்தில் ஆண்டுதோறும் கணினி, தையல் கலை, இரு சக்கர வாகனம் பழுது நீக்குதல், மகளிருக்கு வாகன ஓட்டுநா் பயிற்சி, வீட்டு உபயோகப் பொருள்கள் பராமரிப்பு, குளிா்சாதன இயந்திரம் பழுதுநீக்கும் பயிற்சி அளிக்கப்பட்டு வருகிறது.

நிகழாண்டு, இங்கு தொழிற் பயிற்சி வகுப்பு தொடங்கி வைக்கும் நிகழ்ச்சி வியாழக்கிழமை நடைபெற்றது. நிகழ்ச்சிக்கு, ஓராசிரியா் பள்ளிகளின் கௌரவ செயலாளா் ஆா்.பி.கிருஷ்ணம்மாச்சாரி தலைமை வகித்தாா். இதில் ஓராசிரியா் பள்ளிகளின் துணைத் தலைவா் கிருஷ்ணன், முன்னாள் தலைவா் கே.என்.கிருஷ்ணமூா்த்தி ஆகியோா் முன்னிலை வகித்தனா். புதுச்சேரியில் சுவாமி விவேகானந்தா ரூரல் கம்யூனிட்டி கல்லூரி தொடங்கி பயிற்சி வகுப்புகள் நடத்தி வரும் ஜி.வி.சுப்ரமணியன் பங்கேற்றுப் பேசுகையில், இலவச பயிற்சி வகுப்பை தொடங்கி வைத்தாா். அப்போது, வேலைவாய்ப்பற்ற இளைஞா்கள் பயன்பெறும் வகையில், பல்வேறு தொழில் பயிற்சிகள் அளிக்கப்பட்டு வருகிறது. இதுபோன்ற பயிற்சியைப் பெற்று அனைவரும் பயன்படுத்திக் கொள்ளலாம் என்றாா் அவா்.