ஆசிரியா்களுக்கான பணி பாதுகாப்பு சட்டம் உருவாக்கப்பட்டு உடனடியாக அமல்படுத்தப்பட வேண்டும் உள்ளிட்ட 24 தீா்மானங்கள் தமிழ்நாடு பட்டதாரி ஆசிரியா் மாநில பொதுக்குழு கூட்டத்தில் நிறைவேற்றப்பட்டது.

தமிழ்நாடு பட்டதாரி ஆசிரியா் கழகத்தின் மாநில பொதுக்குழு கூட்டம் திருத்தணியில் அண்மையில் நடைபெற்றது. மாநிலத் தலைவா் ச.பாஸ்கரன் தலைமை வகித்தாா். மாநில ஆலோசகத் தலைவா் பெ.இளங்கோவன், மாநிலச் செயலாளா் ஆா்.கணேசன் ஆகியோா் முன்னிலை வகித்தாா். திருவள்ளூா் மாவட்டச் செயலாளா் பிரபாகரன் வரவேற்றாா். பொதுக் குழுவில் மாநில பொதுச் செயலாளா் து. சோமசுந்தரம் தீா்மானங்களை விளக்கி உரையாற்றினாா். மாநிலப் பொருளாளா் செ. மலா்கண்ணன் வரவு செலவு அறிக்கை தாக்கல் செய்து உரையாற்றினாா்.

இதில், பழைய ஓய்வூதியத் திட்டத்தை உடனடியாக அமல்படுத்த வேண்டும். ஆசிரியா் - மாணவா் ஆசிரியா் - பெற்றோா் உறவு மேம்பட வேண்டும், ஆசிரியா்களுக்கான பணி பாதுகாப்பு சட்டம் உருவாக்கப்பட்டு உடனடியாக அமல்படுத்தப்பட வேண்டும்.

அரசுப் பள்ளிகளில் நிரப்பப்படாமல் உள்ள அனைத்து வகையான காலிப் பணியிடங்களையும் உடனே நிரப்பும் பொருட்டு பதவி உயா்வு கலந்தாய்வை விரைவில் நடத்தப்பட வேண்டும் என்பன உள்பட 24 தீா்மானங்கள் நிறைவேறப்பட்டன. நிகழ்ச்சியில், மாவட்ட கெளரவத் தலைவா்கள் எஸ்.பி.செளத்ரி, என்.பிரேம்குமாா், மாவட்டத் தலைவா் செ.குமாா், அமைப்பு செயலாளா் அருள்ஞானப்பிரகாசம், இணைச் செயலாளா் இளைராஜா, துணைத் தலைவா் ப.திருமலை, திருத்தணி வட்டச் செயலாளா் தாமு உள்பட 300-க்கும் மேற்பட்டோா் கலந்துகொண்டனா். மாவட்டப் பொருளாளா் சக்கரபாணி நன்றி கூறினாா்.