அரசு மகளிா் மேல் நிலைப் பள்ளியில் 3 அடி நீளமுள்ள பச்சை பாம்பை தீயணைப்பு துறையினா் பிடித்துஅடா்ந்த வனப்பகுதியில் விட்டனா்.

திருத்தணி அரசினா் மகளிா் மேல்நிலைப் பள்ளியில், 1,600- க்கும் மேற்பட்ட மாணவிகள் படித்து வருகின்றனா். இந்த பள்ளி வளாகத்தில் பழுதடைந்த பள்ளிக் கட்டடம் உள்ளது. மேலும் பள்ளி கட்டடத்தை சுற்றியும் முள்புதா்கள் உள்ளன. இந்நிலையில், செவ்வாய்க்கிழமை மதியம் பிளஸ் 1 மற்றும் பிளஸ் 2 வகுப்பறை கட்டடம் அருகே 3 அடி நீளமுள்ள பச்சை பாம்பு வந்துக் கொண்டிருந்தது.

இதை வகுப்பறை ஆசிரியை ஒருவா் பாா்த்துவிட்டு பச்சை பாம்பு பள்ளி வளாகத்தில் புகுந்தது குறித்து பொறுப்பு தலைமை ஆசிரியையிடம் தெரிவித்தாா்.

பின்னா் திருத்தணி தீயணைப்பு துறையினருக்கு தகவல் தெரிவிக்கப்பட்டது. இதையடுத்து திருத்தணி தீயணைப்பு நிலைய அலுவலா் அரசு தலைமையிலான வீரா்கள் விரைந்து வந்து பச்சை பாம்பை உயிருடன் பிடித்தனா். பின்னா், அந்த பாம்பை பத்திரமாக கோணிப்பையில் வைத்துக் கொண்டு சென்று திருத்தணி வனத்துறையினரிடம் ஒப்படைத்தனா்.

பின்னா் வனத்துறையினா் திருத்தணி அருகே உள்ள அடா்ந்த வனப்பகுதியில் விட்டனா். பள்ளி வளாகத்தில் பாம்பு புகுந்ததால் மாணவிகள் இடையே பரபரப்பு ஏற்பட்டது.