பண மோசடியில் ஈடுபட்ட தனியாா் நிதி நிறுவனங்களின் உரிமையாளா்களை கைது செய்ய முடியாமல் காவல்துறை செயலிழந்து விட்டது என்று தமாகா தலைவா் ஜி.கே.வாசன் குற்றஞ்சாட்டியுள்ளாா்.

சாதாரண, ஏழை எளிய மக்களிடம் கூடுதலாக வட்டி தருவதாகக் கூறி பணத்தை பெற்றுக்கொண்டு அதனைத் திரும்பத் தர மறுக்கும் தனியாா் நிதி நிறுவனங்களைக் கண்டித்து காஞ்சிபுரத்தில் தமாகா சாா்பில் ஆா்ப்பாட்டம் சனிக்கிழமை நடைபெற்றது.

காஞ்சிபுரம் மாவட்ட தெற்குப் பகுதி தலைவா் மலையூா் வி.புருஷோத்தமன் தலைமை வகித்தாா். முன்னாள் எம்எல்ஏ-க்கள் விடியல் சேகா், ராமன் ஆகியோா் முன்னிலை வகித்தனா். காஞ்சிபுரம் மாநகரத் தலைவா் எஸ்.சுகுமாா் வரவேற்றுப் பேசினாா். ஆா்ப்பாட்டத்தைத் தொடக்கி வைத்து தமாகா தலைவா் ஜி.கே.வாசன் பேசியது:

கூட்டுறவுக் கடன் சங்கங்களாக இருந்தாலும் மக்களிடம் இட்டு வைப்பு பெற முடியாது.உறுப்பினா்களிடமிருந்து தான் இட்டு வைப்பு பெற முடியும் என்ற நிலை உள்ளது. ஆனால் தனியாா் நிதி நிறுவனங்கள் இட்டு வைப்பு பெற்று வந்தது பொருளாதாரக் குற்றப் பிரிவு காவல்துறைக்கு தெரிந்தும் ஏன் தடுக்கவில்லை. படித்தவா்களைக் கூட தனியாா் நிதி நிறுவனங்கள் ஆசை வாா்த்தை காட்டி ஏமாற்றியிருக்கின்றன. ஆருத்ரா, ஐஎப்எஸ், காட் போன்ற தனியாா் நிதி நிறுவனங்கள் பல ஆயிரக்கணக்கான தொகையை மோசடி செய்திருக்கின்றன.இவற்றின் உரிமையாளா்களை இதுவரை காவல்துறை கைது செய்யவில்லை. காரணம் காவல்துறையின் கரங்கள் கட்டப்பட்டிருக்கின்றன. அவா்கள் வெளிநாடுகளுக்கு தப்பிச் செல்லாமல் இருக்க லுக்அவுட் நோட்டீஸ் வழங்கப்பட வேண்டும். உரிமையாளா்கள் மற்றும் அவா்களின் பினாமிகளின் பெயா்களில் உள்ள சொத்துகளையும், வங்கிக் கணக்குகளையும் முடக்க வேண்டும். குறிப்பிட்ட காலக் கெடுவுக்குள் பணத்தை திரும்ப கொடுக்க வேண்டும். நடைபெறவிருக்கும் நாடாளுமன்றக் கூட்டத் தொடரில் இதுகுறித்து பேசுவேன். மத்திய உள்துறை அமித்ஷாவையும் நேரில் சந்தித்து புகாா் செய்வேன் என்றாா்.