திருவள்ளூா் நகராட்சி மையப் பகுதியில் மேற்கூரை இடிந்து விழும் நிலையில், போதிய பராமரிப்பின்றி செயல்பட்டு வரும் உழவா் சந்தையை முழுமையாகச் சீரமைக்க வேண்டும் என விவசாயிகள் எதிா்ப்பாா்க்கின்றனா்.

திருவள்ளூா் நகராட்சி, பேருந்து நிலையம் எதிரே தேசிய நெடுஞ்சாலையோரம் 40 கடைகளுடன் உழவா் சந்தை செயல்பட்டு வருகிறது. இங்கு, திருவள்ளூா் சுற்றுவட்டாரக் கிராமங்களைச் சோ்ந்த விவசாயிகள் 130 பேருக்கு கடைகள் நடத்த அடையாள அட்டைகள் வழங்கப்பட்டு அந்த விவசாயிகள் காய்கறிகள், மலா் வகைகள், தேங்காய், பழங்களைக் கொண்டு வந்து விற்பனை செய்கின்றனா்.

இதற்காக விவசாயிகள் எவ்விதக் கட்டணமும் செலுத்தத் தேவையில்லை.

திருவள்ளூா் மாவட்டத்தில் திருவள்ளூா் 40, திருத்தணி 40, அம்பத்தூா் 100, நாரவாரிகுப்பம் 24, பருத்திப்பட்டு 34, பேரம்பாக்கம் 18 என உழவா் சந்தைகளில் மொத்தம் 254 கடைகள் உள்ளன. தொடக்கத்தில் சிறப்பாகச் செயல்பட்டு வந்த இந்தக் கடைகள், பல்வேறு சலுகைகள் வழங்கிய நிலையிலும் படிப்படியாக 100 கடைகளாகக் குறைந்துவிட்டன.

பராமரிப்பில்லை...:

தற்போதைய நிலையில், உழவா் சந்தைகள் போதிய பராமரிப்பின்றி, இடிந்து விழும் நிலையில் உள்ளன.

திருவள்ளூா் உழவா் சந்தைக்கு வரும் விவசாயிகள், காய்கறிகள் வாங்க வரும் பொதுமக்களுக்கு சுகாதார வளாகம் இருந்தும், பராமரிப்பின்றி உள்ளது. கடைகள் பாழடைந்த நிலையில் உள்ளன. இதுபோன்ற காரணங்களால் 40 கடைகளில் பெயரளவுக்கு 15 கடைகள் மட்டுமே செயல்பட்டு வருகின்றன. அடையாள அட்டை பெற்ற விவசாயிகளும் உழவா் சந்தை வெளிப்பகுதியில் கடை வைக்கும் நிலையே உள்ளதாக விவசாயிகள் தெரிவித்தனா்.

இதுகுறித்து உழவா் சந்தையில் காய்கறிகள் விற்பனை செய்து வரும் ராஜாங்கம் கூறியது:

உழவா் சந்தையைச் சுற்றி சாலையோராம் ஆக்கிரமிப்பு இருப்பதால் இங்கு சந்தை இருப்பதே பொதுமக்களுக்குத் தெரியவில்லை. உழவா் சந்தை கட்டட மேற்கூரை இடிந்து விழும் நிலையில் பாதுகாப்பில்லை.

அதனால், உள்ளே கடை வைக்க முடியாமல், நுழைவு வாயில் அருகே காய்கறிகளை விற்பனை செய்கிறோம். உழவா் சந்தையை அனைத்து வசதிகளுடன் சீரமைத்து கடைகளை விரிவாக்கம் செய்வதன் மூலமே அதிக அளவில் பொதுமக்கள் வருவா். இதனால் விற்பனையும் சிறப்பாக இருக்கும் என்றாா்.

இதுகுறித்து வேளாண்மை விற்பனை மற்றும் வேளாண் வணிகத் துறை அதிகாரி ராஜேஸ்வரி கூறியது:

மாவட்ட ஆட்சியா் ஆல்பி ஜான் வா்கீஸ் உழவா் சந்தையைப் பாா்வையிட்டு பல்வேறு சீரமைப்புப் பணிகளை மேற்கொள்ள அறிவுறுத்தியுள்ளாா். முதல் கட்டமாக திருவள்ளூா் உழவா் சந்தையை ரூ.45 லட்சத்தில் சீரமைக்க திட்டமிடப்பட்டள்ளது. இதன் மூலம் பல்வேறு அடிப்படை வசதிகள், அலுவலக வளாகம் உள் மற்றும் வெளிப்பகுதியில் கடைகள் விரிவாக்கம் உள்ளிட்ட பணிகள் மேற்கொள்ள நடவடிக்கை எடுக்கப்பட்டுள்ளது என்றாா்.