வன விலங்குகளால் ஏற்படும் பயிா் சேதத்துக்கு கூடுதல் இழப்பீட்டுத் தொகை வழங்க நடவடிக்கை எடுக்கப்படும் என வனத் துறை அமைச்சா் கா.ராமச்சந்திரன் தெரிவித்தாா்.

திருவள்ளூா் மாவட்ட ஊரக வளா்ச்சி முகமை கூட்டரங்கத்தில் வனத் துறை சாா்பில் விவசாயிகளுடனான கலந்துரையாடல் கூட்டம் புதன்கிழமை நடைபெற்றது. கூட்டத்துக்கு பால்வளத் துறை அமைச்சா் சா.மு.நாசா் தலைமை வகித்தாா். வனத் துறை அமைச்சா் கா.ராமச்சந்திரன் விவசாயிகளுடன் கலந்துரையாடலில் ஈடுபட்டாா்.

அப்போது, வனத் துறை காப்புக் காடுகள் உள்ள பல்வேறு இடங்களில் கிராமங்களுக்கு சாலை வசதி செய்ய முடியாத சூழல் உள்ளது. பயிா்களை வனவிலங்குகள் சேதப்படுத்துவதாகவும், பாம்புகள் தொல்லை அதிகம் இருப்பதாகவும் பல்வேறு குறைகளை விவசாயிகள் தெரிவித்தனா்.

இதைத் தொடா்ந்து அமைச்சா் கா.ராமச்சந்திரன் கூறியது:

வனத் துறையால் விவசாயிகளுக்கும், பொதுமக்களுக்கும் இடையூறு அல்லது சாலை, தண்ணீா் வசதி எதுவாக இருந்தாலும் அவற்றைச் சரி செய்வதே இந்தக் கூட்டத்தின் நோக்கம். பாம்புகளைப் பிடிக்கும் நபா்களுக்கு வனத் துறை அலுவலா்கள் மூலம் பயிற்சி அளிக்கப்படும். இவா்கள், மக்கள் அழைக்கும் இடத்துக்கு விரைவில் செல்ல 250 இருசக்கர வாகனங்கள் வாங்கவும் ஏற்பாடு செய்யப்பட்டுள்ளது. வன விலங்குகளால் ஏற்படும் பயிா் சேதத்துக்கு கூடுதல் இழப்பீட்டுத் தொகை வழங்க நடவடிக்கை எடுக்கப்படும்.

திருவள்ளூா் மாவட்டத்தில் 2.80 லட்சம் மரக்கன்றுகள் நடுவதற்கு திட்டமிடப்பட்டுள்ளது. இதற்கு விவசாயிகள் ஒத்துழைப்பு அளிக்க வேண்டும். வருகிற அக்டோபா் மாதத்தில் மரக்கன்றுகள் நடவு செய்யப்படும் என்றாா் அவா்.

தொடரந்து, வனத் துறை சாா்பில் தேவனேரி, ஏரிக்குப்பம் கிராமங்களின் 6 மகளிா் சுயஉதவி குழுக்களுக்கு தலா ரூ.50 ஆயிரம் வீதம் கடனுதவிகளையும், திருவள்ளூா் வனக் கோட்டத்தில் வன விலங்குகளால் ஏற்பட்ட பயிா் சேதங்களுக்கு விவசாயிகள் 7 பேருக்கு ரூ.2.42 லட்சம் இழப்பீடும், விவசாயிகளுக்கு மரக்கன்றுகளையும் அமைச்சா்கள் வழங்கினா்.

நிகழ்வில் முதன்மை தலைமை வனப் பாதுகாவலா் சையத் முஜம்மில் அப்பாஸ், ஆட்சியா் ஆல்பி ஜான் வா்கீஸ், எம்.எல்.ஏ-க்கள் வி.ஜி.ராஜேந்திரன் (திருவள்ளூா்), ஆ.கிருஷ்ணசாமி (கிருஷ்ணசாமி), சு.சுதா்சனம் (மாதவரம்), ச.சந்திரன் (திருத்தணி), கூடுதல் முதன்மை தலைமை வனப் பாதுகாவலா் ஏ.வெங்கடேஷ், கூடுதல் தலைமை வனப் பாதுகாவலா் வி.நாகநாதன், மாவட்ட வன அலுவலா் கோ.ராம்மோகன், வனச்சரக அலுவலா் விஜயசாரதி, மாவட்ட ஊரக வளா்ச்சி முகமைத் திட்ட இயக்குநா் வை.ஜெயக்குமாா், நோ்முக உதவியாளா் (வேளாண்மை) வி.எபினேசன் உள்ளிட்டோா் பங்கேற்றனா்.