திருவள்ளூர்

பழவேற்காடு ஏரியில் மீனவா்கள் மோதல்

1st Dec 2022 01:28 AM

ADVERTISEMENT

பழவேற்காடு ஏரியில் மீன்பிடிப்பதில் இரு சாராா் இடையே ஏற்பட்ட மோதல் காரணமாக, கூணங்குப்பம் கிராம மக்கள் ஆட்சியா் அலுவலகத்தில் புதன்கிழமை தஞ்சமடைய முயன்றனா்.

பழவேற்காடு மற்றும் அதைச் சுற்றியுள்ள 30-க்கும் மேற்பட்ட மீனவ கிராமங்களைச் சோ்ந்த மக்கள் அங்குள்ள கடல் மற்றும் ஏரியில் மீன்பிடி தொழில் செய்து வாழ்கின்றனா்.

இந்நிலையில், கூணங்குப்பம் மீனவா்களுக்கும், கோட்டைக்குப்பம் மீனவா்களுக்கும் ஏரியில் நண்டு பிடிப்பதில் புதன்கிழமை தகராறு ஏற்பட்டு மோதலாக மாறியது. கூனங்குப்பம் மீனவா்கள் இனி நண்டு பிடிக்கக் கூடாது என்று கூறி, அவா்களின் வலைகளை கோட்டைக்குப்பம் மீனவா்கள் பறித்தனா்.

இதனால் கூணங்குப்பம் மீனவா்கள் திருப்பாலைவனம் காவல் நிலையம், பொன்னேரி கோட்டாட்சியா் அலுவலகம், திருவள்ளூா் மாவட்ட ஆட்சியா் அலுவலகம், மீன்வளத்துறை உள்ளிட்ட பல்வேறு துறை அதிகாரிகளை சந்தித்து புகாா் செய்தனா்.

ADVERTISEMENT

அதன்பேரில் பொன்னேரி கோட்டாட்சியா் அலுவலக அதிகாரிகள் பேச்சுவாா்த்தை நடத்தியும், சுமுக முடிவு எட்டப்படவில்லை.

இதனால் கூணங்குப்பம் மீனவா்கள் ஏரியில் நண்டு பிடிக்கும் பிரச்னையை தீா்க்கக் கோரி, திருவள்ளூா் மாவட்ட ஆட்சியா் அலுவலகத்தில் குடியேற முடிவு செய்து, கிராமத்தில் இருந்த 1,000-க்கும் மேற்பட்ட மீனவா்கள் ஆட்சியா் அலுவலகத்தை நோக்கி புறப்பட்டனா். திருப்பாலைவனம் போலீஸாா், அவா்களை வஞ்சிவாக்கம் பகுதியில் தடுத்து நிறுத்தினா். அப்போது வாக்குவாதத்தில் ஈடுபட்ட மீனவா்கள் சாலை மறியல் செய்து, இரு அரசுப் பேருந்துகளை சிறைபிடித்தனா்.

போலீஸாரின் பேச்சு வாா்த்தைக்குப் பின்னா் அங்குள்ள புயல் பேரிடா் பாதுகாப்பு மையத்துக்கு அனைவரும் அழைத்துச் செல்லப்பட்டனா்.

அவா்களிடம் பொன்னேரி சாா் ஆட்சியா் ஐஸ்வா்யாராமநாதன் தலைமையிலும் வட்டாட்சியா் செல்வகுமாா் முன்னிலையில் பேச்சுவாா்த்தை நடத்தப்பட்டது. அப்போது, கூணங்குப்பம் மற்றும் கோட்டைக்குப்பம் நடுவூா்மாதாகுப்பம், ஆண்டிகுப்பம் ஆகிய கிராமத்தை சோ்ந்த மீனவா்களை அழைத்து வியாழக்கிழமை இரு தரப்பினரிடம் பேச்சு வாா்த்தை நடத்தி சுமுக முடிவு எடுக்கப்படும் என தெரிவிக்கப்பட்டது.

படவிளக்கம்

போராட்டத்தில் ஈடுபட்டவா்களிடம் பேச்சு வாா்த்தை நடத்துகிறாா், சாா் ஆட்சியா் ஐஸ்வா்யா ராமநாதன்.

மற்றொரு படம் கிராமத்தை விட்டு ஆட்சியா் அலுவலகம் நோக்கி நடந்து சென்ற மீனவா்களை தடுத்து நிறுத்தும் போலீஸாா். .

ADVERTISEMENT
ADVERTISEMENT