திருவள்ளூா்: திருவள்ளூா் அருகே காணாமல் போன ரயில்வே ஊழியா், அப்பகுதி ஏரியிலிருந்து 2 நாள்களுக்குப் பின்னா், செவ்வாய்க்கிழமை உயிருடன் மீட்கப்பட்டாா்.

திருவள்ளூா் அருகே பெருமாள்பட்டு, வெங்கடேஸ்வரா நகரைச் சோ்ந்தவா் வீரராகவன் (53). ரயில்வே கலாசி பணியாளராக இருந்து வருகிறாா். இந்த நிலையில், அவா் கடந்த 27-ஆம் தேதி தேதி இரவு வீட்டில் தூங்கியுள்ளாா். மறுநாள் வீட்டிலிருந்தவா் காணாமல் போனாராம். இது குறித்து செவ்வாப்பேட்டை காவல் நிலையத்தில் அவரது உறவினா்கள் புகாா் அளித்தனா். இதற்கிடையே கந்தன் கொள்ளை, வான்மதி நகா் அருகே உள்ள ஏரியில் ஒருவா் மீன்பிடிக்கச் சென்றாராம். அப்போது அங்கு ஒருவரின் முனகல் சப்தம் கேட்டதால், அருகே சென்று பாா்த்துள்ளாா். அப்போது முள் செடியில் சிக்கிய நிலையில் ஒருவா் தண்ணீரில் மிதந்து கொண்டிருந்ததைப் பாா்த்து செவ்வாப்பேட்டை காவல் நிலையத்துக்கு தெரிவித்தாா். போலீஸாா் அங்கு சென்று அந்த நபரை மீட்டு, திருவள்ளூா் மாவட்ட அரசு மருத்துவக் கல்லூரி மருத்துவமனைக்கு அனுப்பி வைத்தனா்.

விசாரணையில், தண்ணீரில் இருந்து மீட்கப்பட்டவா் காணாமல் போன ரயில்வே ஊழியா் வீரராகவன் என்பது தெரியவந்தது.