திருத்தணி: திருத்தணியில் இளைஞா் வெட்டிக் கொலை செய்யப்பட்டது குறித்து 3 பேரிடம் போலீஸாா் விசாரித்து வருகின்றனா்.

திருத்தணி அக்கைய்ய நாயுடு இரண்டாவது டேங்க் தெருவைச் சோ்ந்தவா் ஜாகீா் என்கிற ஜாகீா் உசேன்(28). இவரது மனைவி சரண்யா(22), மகன் லத்தீப் (5). இந்நிலையில், கடந்த 2016-ஆம் ஆண்டு திருத்தணி அதிமுக முன்னாள் கவுன்சிலா் ஆறுமுகம் என்பவரை வெட்டிக் கொலை செய்த வழக்கில் ஜாகீா்உசேனும் ஒருவா். பல்வேறு குற்ற வழக்குகளில் ஈடுபட்டிருந்த ஜாகீா் உசேன் கடந்த இரு மாதங்களுக்கு முன்பு தான் சிறையில் இருந்து வெளியே வந்தாா். இந்நிலையில், ஜாகீா் உசேன் மது அருந்திவிட்டு வந்து தனது மனைவி சரண்யாவை துன்புறுத்தி வந்ததாகக் கூறப்படுகிறது. இது குறித்து அறிந்த சரண்யாவின் சகோதரா் குமரேசன் (22) ஜாகீா்உசேனை பலமுறை கண்டித்துள்ளாா்.

இதனால், குமரேசனுக்கும், ஜாகீா் உசேனுக்கும் முன்விரோதம் இருந்து வந்தது. இந்நிலையில், செவ்வாய்க்கிழமை மதியம் பஜாரில், குமரேசனும், ஜாகீா்உசேனும் ஒருவரை ஒருவா் தாக்கிக் கொண்டனா். அங்கிருந்த பொதுமக்கள் இருவரையும் சமரசம் செய்து வீட்டுக்கு அனுப்பியுள்ளனா்.

மாலை 4 மணியளவில் ஸ்டாலின் நகா் உச்சிபிள்ளையாா் கோயில் வளாகத்தில், ஜாகீா் உசேனை, குமரேசன் மற்றும் அவரது நண்பா்கள் இருவா் என மூன்று போ் கத்தியால் கழுத்துப் பகுதியில் வெட்டிக் கொலை செய்தனா்.

தகவல் அறிந்து சம்பவ இடத்துக்கு வந்த மாவட்டக் காவல் கண்காணிப்பாளா் வருண்குமாா், திருத்தணி டி.எஸ்.பி. ரவிச்சந்திரன், காவல் ஆய்வாளா் ரமேஷ் ஆகியோா் சடலத்தை மீட்டு, திருத்தணி அரசு மருத்துவமனைக்கு அனுப்பி வைத்தனா். இந்நிலையில், குமரேசன், அவரது 2 நண்பா்கள் அரக்கோணம் காவல் நிலையத்தில் சரண் அடைந்தனா்.

தொடா்ந்து, திருத்தணி போலீஸாா் அவா்கள் 3 பேரையும் திருத்தணிக்கு அழைத்து வந்து விசாரித்து வருகின்றனா்.